Niadtong Sabado sa Ayala gisaulog ang Litfest 2016 edition. Ni-volunteer ko pagkamaniniyot para sa among kompaniya para makatambong ko niadtong maong panagtigom sa mga manunulat.
Ug tuod man nahimamat ko si Simeon “Jun” Dumdum Jr., ang kanhi huwes, kulumnista ug magbabalak.
Iya kong gidala ngadto sa TGIF nga kan-anan. Ug didto sa sulod ang akong mga maestro niadto nga sila ni Resil Mojares ug Rene Alburo. Didto usab ang ilang higala nga si Rolando Alfar. Midagkot si Resil og sigarilyo ug miorder og kape para namong tanan. Ilang gipahimuslan kining mubong panahon sa ilang panaghugpong sa paghisgot sa ilang mga binuang sa ilang pagkabatan-on.
Nahimuot silang tanan sa ilang mga sipat nga kaagi. Kini gud untang maong pangape, ila man kining pamaagi sa pag “kill the time” samtang gahuwat sila nga tawgon silang Jun ug Resil ngadto sa entablado para mohisgot kabahin sa mga bag-o nilang libro.
“The Feat of the Santo Niño (An Introduction to the History of Cebuano Devotion)” ang bag-ong libro ni Resil Mojares. Ang USC Press mao ang publisher niani ug didto kini giprinta sa Clint KAMMS Corporation. Ang USC Press ug ang Clint KAMMS mao usay nagpagawas sa kang Jun Dumdum nga letter from Fatima.
Nonfiction ang libro ni Resil kay historical survey man kini sa debosyon sa mga Sugbuanon sa imahen sa lainlaing mga panahon. Dili kabahin sa mga milagro ug kahibulungan kining gisulat ni Resil. Ang mabasa mo sa maong libro mao ang relasyon sa Santo Niño sa mga katilingban nga nagpalibot kaniya sa mga lainlaing siglo nga milabay.
Ang kang Jun usa ka libro sa balak nga pasalamat sa Birhen sa Fatima sa France sa milagro niani nga mipaayo sa iyang sakit nga cancer.
Pero kay wa man dayon maabot ang kape, miabot ang ilang istorya ngadto sa mga libro ug manuscript nga karaan ug asa ning maong mga sinulat ang angay i-reprint.
Ug kay wa pa man gihapoy kape nga milanding sa among lamesa, miabot ang ilang istorya kang Padre Rudy Villanueva nga naila isip Renato Madrid sa iyang mga gipanulat. Nibisita kuno si Resil sa maong writer-composer nga si Villanueva dihang nag-istar pa kini sa compound sa Carmelites ug gihisgutan niya ang posibilidad sa paghimog libro, mabag-o man o reprint, apan matud pa ni Resil daw nawad-an na kinig interest sa mga libro ug miingon na lag “What for?”
Ug mitindog si Resil ug mitawag sa waitress para mangutana kon naunsa na among kape. Apan nahingangha kini ug molista unta pag-usab sa among order. Apan niadtong tungora gisulod na kami sa organizer sa Litfest kay paadtuon na sa entablado si Resil ug Jun.
Ug gi-cancel na lang ang order sa kape kay “what for?”
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
