‘Yabag ug arogante’ng mayor’

By: Lloyd Suarez December 18,2016 - 07:32 PM

Pagkayabag ug pagka-arogante gyud ni Cebu City Mayor Tomas Osmeña nga mi-ban kang Jose Santino Bunachita, reporter dinhi sa CDN sa iyang press conference niadtong miaging simana.

Mao ning klaseha sa opisyal nga hangtud karon wa pa makasabot sa atong mga ladga sa balaud.

Nagtoo seguro si Tommy nga siya’y tag-iya sa City Hall.

Gipangayo-an siya’g katin-awan pag-ban ni Santino apan wa kahatag sa specific story nga bias ang reporter.

Usa sa mga suud nga higala sa mayor mitug-an nga ang nahiubsan ni Tommy kang Santino mao ang gi-post niini sa Facebook nga wa sab moklaro kung unsay na post.

Unsa may gusto ni Tommy, himoon niya’ng tuta ug gawngan ang mga tigbalita sa City Hall nga di nalang maka-komentaryo sa iyang patakaran ug sestema bisan sa ilang personal nga kapasidad?

* * *

Dunay usa ka doctor sa gobyerno sa Kapitolyo, biktima sa kawat-kuot sa iyang pitaka atul sa ilang joint Christmas party niadtong Biyernes sa hapon samtang nagkalingaw pagsaksi sa mga pasundayag sa social hall.

Ang biktima mao si Dr. Lea Celestial, chief sa Ricardo L Maningo District Hospital sa San Francisco, Camotes. Ang iyang pitaka nga may compartment may sulod nga 900 pesos kapin ug mga mahalon nga alahas.

May lang gani kay dili tanto’ng kawatan ang nanghilabot kay kuwarta ray gikuha. Pero posibleng wa makit-i ang mga alahas.

Ang iyang pitaka nakit-an nalang sa lamesa sa claim area sa raffle sa usa ka kawani nga si Harbel Ofqueria sa bids and awards committee (BAC).

Ang taga BAC maoy in-charge sa electronic raffle.

Akong nahibaw-an si Dr. Celestial nagpuyos sa iyang daku’ng bag sulod sa social hall. Maayo lang gani kay ang iyang 40 mil pesos nga gibuwag sa duha ka sobre nabutang sa pinaka-ilawom sa bag. Kay kung nabutang pa sa pitaka puwerte’ng subo-a sa pasko ni Dr. Celestial.

Ang pangutana, kinsa may kawatan? Dili to adik? Alangan mamasangil ta sa mga kawani sa City Hall. Trabahante ra gyud sa Kapitolyo ang responsable.

Mas maayong imbestigahon kini ni Governor Junjun Davide ug ipasubay ang CCTV camera.

Posible ba nga ang responsable, midaug og minor prize unya gibilin nalang didto ang pitaka human nakonsensiya?

* * *

Dili na gyud makaya sa atong mga huwes ang gidaghanon sa mga kaso karong panahuna.

Ambot kung unsay hinungdan sa grabeng kalangay pagtudlo’g mga huwes ug mga piskal.

Didto lang sa Barili ug Argao Regional Trial Court akong nahibaw-an nga duna nay mga settings sa mga kaso nga adto na sa 2018.

Sumaa pa nga upat ngadto sa lima ka mga huwes ang angayang ibutang sa Barili ug Argao.

Diha lang sa Cebu City Prosecutor’s Office alarming na gyud ang pagsaka sa mga kaso kay sa buwan lang sa Nobyembre karong tuiga mo-abot sa 1,080 ka mga kaso unya 95 porsiento niini mga parte sa illegal drugs.

Bisan sa Provincial Prosecutor’s Office puwerte gyu’ng daghanang mga kaso.

Segurado ko nga mao sab kini ang sitwasyon sa lain-laing mga opisina sa prosecution service sukad milingkod si president Duterte kay na-engganyo pag-ayo ang atong kapolisan paglihok kay dunay quota nga gipatuman sa ilang mga commanders.

Kanus-a man tawon masulbad sa Korte Suprema kining maong problema?

Kung alarming na ang court docket sa kalungsuran samot na gyud dinhi sa dakbayan sa Sugbo ug sa ubang mga dagkung Siudad.

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: BAC, Bids and Awards Committee, Cebu City, Christmas, Christmas Party, City hall, Duterte, Friday, mayor, President, Rodrigo Duterte, system

We use cookies to ensure you get the best experience on our website. By continuing, you are agreeing to our use of cookies. To find out more, please click this link.