Nyor Gamay (NG): Nyor, unsa may ikasulti nimo aning panggukod sa gobyerno sa mga Bombay nga tigpatanto?
Nyor Dako (ND): Morag di man ko 100% sure nga maayo ni, Nyor. Tingali wa kaayo ko masinati sa tumong ug tinguha sa atong kagamhanan.
NG: Di ba Digonerz man ka, Nyor?
ND: Tinuod. Apan wa kini magpasabot mag sigue lang tag tando sa ibungat sa gobyerno. O nga dili ba kaha hinuon nga wa gyud silay sipyat.
NG: Matod pa ni Digong, Nyor, magbaguod intawon ang mga Pinoy nga nagkalisod na daan pagbayad ning 5-6 nga pamaagi sa mga Bombay.
ND: Tinuod na, Nyor. Apan ang mas dakong katarungan kon nganong gigukod kini sa gobyerno mao nga di sila makabuhis ning mga tigpatanto o “informal lenders” nga way rehistro sa SEC.
NG: So, uyon ka, Nyor, nga sikupon ning mga Bombay ug i-deport?
ND: Nyor, dili lang baya ang mga Bombay maoy nagpatantog 5-6. Dunay mga pamilya sa mga overseas workers nga naghimo usab niani.
NG: Sa ato pa apilon ni silag sikop?
ND: Natural. Kalain ba sad anang ang hitsura maoy basihan sa balaod. Pero alang kanako, dili man gud ang pagpanggukod maoy maayong solusyon batok sa 5-6. Tinuod sakit-sakit ang interest nga ilang pangayuon kanimo. Pero unsa may imong buhaton kon wa kay puhonan o collateral para sa usa ka loan? Unsa may buhaton mo pananglitan kon dunay emergency unya wa kay papelis?
NG: Matod pang Ai-Ai sa iyang pelikula, Nyor, “Ang taong gipit, sa Bombay kumakapit.”
ND: Unya taas pud og pasyensya kining mga tawhana. Matag adlaw maglibotlibot kini sila sakay sa ilang gagmay nga motor para mokolekta sa installment nga bayad. Ambot kon duna ba kahay Pinoy nga makaantos aning ilang style. Ang ila rang di ganahan kanang tago-tagoan sila. Modawat ra sila bisag kuwang imong ihatag.
NG: Unsa man diay imong gustong buhaton sa kagamhanan, Nyor? Di man kaha ka kumbinsido kaayo nga ang pagsikop ning magpatanto maoy makasulbad sa atong kawad-on.
ND: Ang angay buhaton sa gobyerno, dili manggukod sila. Mokumpetensya sila. Ilang paluagan ang mga requirement sa mangutang. Ilang wagtangon ang red tape. Ug mopagawas silag super easy installment plan.
NG: Apan daghan man gud ang di mobayad, Nyor.
ND: Mao na diha. Mibutho ang mga 5-6 kay sila ra may mosukol sa atong kabadlungon. Dili ang gobyerno maoy nakapawagtang sa Bombay kon dili kita ra usab. Di ta mangutang para lang mopalit sa mga butang nga atong naibgan labi nag wa tay ikabayad. Wa bayay gasugo nato pagpangutang sa mga Bombay. Sa Ininglis pa, “It takes two to Tango.”
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
