SUAREZ
Ang labing epektibo nga himion ni Governor Junjun Davide sa Cebu Provincial Detention and Rehabilitation Center (CPDRC) ug mga warden sa lainlaing mga jail facilities aron epektibo ang kampanya sa illegal drugs mao nga wa nay itugot nga dalaw ug conjugal visit.
Kinahanglang ipatuman sab ang total revamp sa mga personnel. Mga well-trained ug batan-on maoy pabantayon.
Nakapanglingolingo ko sa mga jail officers diha sa CPDRC kaniadto kay may utang nga kuwarta sa mga piniriso.
Ambot lang kung nakabayad na ba ang mga kanahan? Ang rason sa mga guwardiya kay gamay ra ilang suweldo.
Usa kini sa mga hinungdan nga di gyud masulbad ang problema diha. Ang bottom line niining tanan mao gyud ang grabeng corruption sa atong mga prisohan.
Unsa man sab ning gipasiatab sa taga Amnesty International ug sa taga Commission On Human Rights (CHR-7) nga nalapas kuno ang tawhanong katungod sa mga binilanggo dihang gipahubo ang mga lalake sa taga PDEA atol sa greyhound operation?
Lisud ni’ng mga tawo nga wa makasabot sa security measures.
Kung wa pa to pahuboa, di kaha to mag-riot? Kung nag-riot ug dunay nangamatay, mas dako ang danyos.
Asa man tuod ang taga CHR niadtong greyhound operation sa Cebu City Jail nga gipahubo gihapon ang mga piniriso? Wa lagi silay ek ato?
* * *
Kutob ra gyud sa pagpanghimakak si SPO2 Nelson Mayuela, desk officer sa Liloan Police Station, sa alegasyon nga siya maoy nangunay pagpalusot og shabu sa ilang mga piniriso Hinuon way kawatan nga moangkon.
Miingon pa siya ngadto sa iyang hepe nga si Chief Inspector Franco Oriol nga gikontrahan lang siya sa mga piniriso tungod sa iyang ka strikto.
Sa initial investigation, ang pulis maoy mobagsak sa pinaketeng shabu ngadto kang Procopio Gromia Jr. kinsa usa sa tulo ka mga piniriso nga nakuhaan og shabu atol sa greyhound operation niadtong Huwebes.
Kauban nga nakuhaan sila si Jeppe Rosal ug Arnel Noval Mata nga giingong mga hitman ni drug lord Barok Alvaro ug maoy gipangtumbok nga mga responsable pag-ambush patay sa hepe sa Poro, Camotes nga si S/Inspector Jonas Tahanlangit.
Nahibaw-an sab nga uyab ni SPO2 Mayuela ang igsoon sa usa sa mga piniriso nga drug pusher nga tawo ni “Barok” Alvaro.
Di nako matingala unya nga may mga pulis nga matumba niining balik kampanya sa PNP tungod kay ang uban kanila apil sa sindikato. Paeta gyud!
Diha sa balwarte ni drug lord Franz Sabalones, parelibuhan sab ang tanang pulis sa San Fernando kay mga hawshaw pud.
Ang mga pulis sa Carcar, perme’ng exempted bisag grabe ang paghitak sa shabu?
* * *
Niadtong Sabado sa hapon atol sa among programa’ng Dialogue On The Air sa Super Radyo, among gituki ang pag-phase out sa mga PUJ nga nag-edad og 15 years and up.
Sila si Greg Perez sa PISTON miingon nga dako gyud ang posibilidad nga dunay laing mga rally ug welga kung idayon gyud sa gobyerno.
Ang ila mao nga ayom-ayomon lang gyud ang ilang mga units aron mabuhi ilang industriya ug makapadayon sa panerbisyo sa barato nga plitihan.
Ilang giangkon nga ang ilang mga units “no show” gyud sa LTO MVIC panahon sa renewal. Mao diay nga bisag binaatan og alambre, nagdagan gihapon.
Willing na sila karon nga mosusi gyud ang taga LTO sa ilang mga units aron maoy morekomendar kung unsay pang-ilisan.
Pero alang nako, insakto na kaayo to ang sugyot ni Julito Flores, presidente sa Mini Bus Operators, nga hangyuon ang gobyerno pagpatuman og 3 years moratorium aron pangandaman ang hingpit nga implementasyon.
Nindot ug wa gyu’y hasol ang bag-o.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
