Gerard Pareja
Ang pinakasikat nga pulong niadtong 2016 mao ang tokhang. Karong tuiga, kon ang social media maoy imong basihan, ang pinakasikat nga pulong mao ang Xander. Pero duna kini sumpay — Ford. Xander Ford.
Kon litukon mo kinig paspas usahay ang mosulod sa imong dunggan mao ang thunderbird. Ang short-cut ning thunderbird mao ang t-bird nga nahimong slang for lesbians. Pero kon i-google mo ang thunderbird karon ang kasagarang molugwa mao man ang email app sa Mozilla, nga usa ka search engine.
Kon ang TV imong basihan, kining thunderbird lawog sa manok pangsabong. Pero ang original nga thunderbird usa ka taas nga sedan sa Ford. Kon sakyanan man gali diay hilig aning Xander, maayo niyang pagkapili ang iyang alyas. Kay lain man paminawon ang Xander Toyota o Xander Kia. Pero in fairness, ok ra baya ang Xander Suzuki.
Ang kasagarang angga sa Alexander, Alex apan duna say uban nga Xander. Apan ang pangan tinuod ni Xander kay Marlou. As in Marlou Aquino sa Ginebra team ni Jaworski niadto. Marlou Arizala ang karaang ngalan ni Xander Ford sa wala pa kini magpa plastic surgery.
Si Marlou Arizala maoy giingong pinakabatig nawong sa HASHT5, ang boy group nga kanunay nga bugalbugalan.
Misikat ang ilang Facebook page tungod sa libolibo ka mga bashers. May niingon pa gani nga miabot nas usa ka milyon ang nang himaraot kanila. Sigi silang imbitahon sa ABS-CBN para i-contrast sa mga tisoy ug mas tag-as nga contract star ning maong network.
Kanunay nga maputos sa bugalbugal kining HASHT5 pero gusto man g’yud sila mag showbiz maong padayon lang gihapon sila.
Apan kalit lang naka disidir si Marlou Arizala nga magpagwapo na siya ug maong nagpa plastic surgery. Ambot kon kinsay ga finance sa iyang pagpausab sa nawong. Basig ang ABS-CBN ra pod. Mo balor og 435,000 ka pesos ang iyang gasto. Makapalit na kitag 2nd hand nga SUV niani.
Giusab ang iyang hairline, kilay, pilok, ilong, ngipon, suwang, ngabil ug miagi usab siyag pa wagtang sa kunot (nga bata pa man unta ni siya).
Nahimo karon siyang guinea pig sa usa ka social media experiment kon mag malampuson ba ang usa ka binuhat kon usbon niya iyang appearance.
Ang plastic surgery ug cyberbullying maoy nahimong center sa conversation ning iyang gihimo.
Kon nagpa liposuction kaha sa iyang tiyan si Harvey Weinstein, miadtog gym unya nag pa plastic surgery ala Xander Ford makuha ba unta niya sila ni Gwyneth Paltrow ug Angelina Jolie? Makig ligidligid ba kaha sila sa kama uban kaniya kon nakopya pa niya ang nawong ni Brad Pitt.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
