Long goodbyes

Gerard Pareja

Niadtong panahon nga lagputunon na si Erap, daghang galagut kang Cardinal Vidal kon nganong di siya moapil sa pag-ataki sa maong pangulo.

Wala pa niadtoy Facebook ug maong ang mga paghimaraut sa cardinal diha manglugwa sa text messages.

Daghan ang mitawag kaniya og talawan. Apan wala niya kini panumbalinga.

Ug karong mipanaw na siya, ug nga ikatulo na karong pangulo sukad mapalagput si Erap ang namunuan daw mas masabtan na nato ang paglikay sa cardinal sa pagkontra sa pamunuan ni Estrada niadto.

Gani ang iyang wa pag kontra ni Erap dili man tinalawan. Mao kini ang iyang baruganan. Ug iya kining gibarugan. Dili siya buot nga mamulitika ang simbahan. Ug tingali diha siyay lawum nga pagsabot sa politika ug nga nakuha niya nga ang pagpalagput ni Estrada dili makatabang sa kinabuhi sa mga yano nga parokyano.

Ug tuod man nalagput si Erap. Ug ang napuli niani gipalagput usab. Motuo ako nga nakuha sa cardinal nga kining tanan zarzuela lamang sa mga naa sa poder ug makalawgaw lang sa lakaw sa simbahan ang pamolitika.

Karong mipanaw na ang cardinal, daghan ang mihisgut sa iyang humility o pagka mapahiubsanon. Dakog purohan nga usa kini sa mga rason nga di siya mointra ning mga politikanhong kagubot. Kay bisan pa iyang poder midawat siya nga dili hingpit ang iyang kaalam bahin sa pang gobyerno ug mas maayo nga mga tao na lay padisidihon kon kinsay angay mamunuan ug kon unsaon pagpamunuan.

Dili tanang pangulo sa simbahan susama kaniya. Dunay uban nga aktibo kaayo sa ilang krusada batok sa ilang gituohang sayop sa kagamhanan. Wala mokuyog ang cardinal kanila apan wa usab siya mobadlong kanila. Alang kanako wa kini magpasabot nga way baruganan ang cardinal. Wala lang siya manghilabot ning iyang mga kauban kay mirespitar siya sa ilang panahum.

Kon ang kinabuhi susama pa lang sa sinsiyo o medalya, maingon ta nga naa sa us aka bahin o nawong si Cardinal Vidal. Samtang sa pikas bahin mahimutang ang susama kanila ni Isnilon Hapilon ug Omar Maute nga mangdaut ug mangguba (ug mopatay) para mapasulong ang ilang kausa ug pagtuo.

Nangamatay kining duha dihang gibirahan sila sa atong kasundaluhan. Nauna silag kamatay sa cardinal ning semanaha. Susama sa cardinal dili dali makalimtan ang ilang kinabuhi ug kamatayon. Apan sukwahi sa kinabuhi sa cardinal, dakong kadaut ang ilang nahimo sa dakbayan sa Marawi ug daghang kinabuhi ang nakalas niani. Wa magpasabot nga way baruganan ang wa manghasi.