Mayor nga bastos?

By: Lloyd Suarez November 12,2017 - 10:07 PM

SUAREZ

Brutal g’yud kaayo ka bastos ang gi-post sa Facebook page ni Cebu City Mayor Tomas Osmeña nga #TeamRamaBahogB_l_t.

Dakung insulto kini sa kababainhan ilabina sa mga sakop sa Team Rama nga maoy direktang giigo human gibabagan sa konseho sa Team Rama ang mga katuyuan pagsulbad sa kabaho sa labayanan og mga basura sa Inayawan.

Mosambalik baya ni’ng isyuha ngadtong City Councilor Margot Osmeña nga asawa ni Tommy ug inahan ni Miguel.

Nakapahinumdum kanako kining isyuha niadtong usa sa mga kalihukan sa founding anniversary sa Kapitolyo nga dunay mga gipang-display nga bulad-isda atubangan sa karaang building sa Palace of Justice.

Ang usa ka si-aw nga beteranong abogado nga dili na makaklaro nga mi-agi duol sa mga bulad nagkanayon nga “good morning ladies.”

Natingala ang mga lalaki nga nakadungog kay niadtong mga tungura way mga babaye. Naglumba nalang sa pagpangatawa ang mga nakasabot sa iyang “good morning ladies” kay ang kabaho sa bulad anggid-anggid sa b_l_t.

Bitaw kung di lang g’yud butangan og malisya, kitang tanan natawo sa baho kay diha sa baho anaa sab ang lami.

Wa man angkona ni Osmeña nga siya maoy nag-post ug atong nahibaw-an iyang anak nga si Miguel maoy administrator sa iyang FB account.

Kining gi-post dili g’yud angayan sa usa ka amahan dinhi sa dakbayan sa Sugbo.

Mahimo lang kini sa tawong adik ug kadtong wa nay insaktong paminsar sa utok. Responsable pa ni sila’ng user sa social media?

* * *

Nakapanglingo-lingo ko sa akong nahibaw-an gikan kang Cebu Provincial Prosecutor Pepita Jane Petralba nga kuwang kaayo ang mga piskal sa lalawigan sa Sugbo panahon nga maka-operate na ang tanang 80 ka mga korte.

Unsaon man intawon pagbahin ang mga korte sa mga piskal nga moabot ra man sila og 23 ka buok dala ni Petralba.

Ang mahitabo dunay mga piskal nga tag tulo (3) or tag upat (4) ka mga korte.

Ang nakapaet pa g’yud kay lagyo ug distansiya ang mga korte sa kalungsuran.

Lahi dinhi sa dakbayan sa Sugbo diha sa Qimonda IT Center kay anaa ra sa usa ka building unya daghan og mga piskal.

Kung ingon ani ka kulang ang mga piskal sa probinsiya unsaon man pagpatuman sa mandatory continuous trial sa mga kaso nga maoy mando ni Supreme Court Chief Justice Maria Lourdes Sereno?

Unsa man sab ang hinungdan nganong nalangay man si Presidente Duterte pagtudlo og mga bag-ong piskal?

* * *

Pagkadaghan na g’yud nila diha sa Kapitolyo nga natakdan sa sakit sa iro, kung tinuud man kining isyu batok kang Baltazar Tribunalo, hepe sa Provincial Disaster Risk Reduction and Management Office (PDRRMO) ug nagdumala karon sa Provincial Environment and Natural Resources Office (Penro) nga nangu-ot siya’g sampot ngadto sa iyang staff nga babaye.

Maayo lang gani kay mitiyabaw ang giingong biktima ug nagpakitabang kang Vice Governor Agnes Magpale ug mi-execute na og affidavit.

Pero unsa pa may padulngan sa imbistigasyon nga giduphan naman si Tribunalo ni Gobernador Junjun Davide?

Kining pag-depensa ni Davide ngadtong Tribunalo dili pa kini timailhan nga nag-aslom na ang relasyon nilang Davide ug Magpale.

Ang isyu nahitabo niadto pa’ng Hunyo. Wa kaha sulsoli ang biktima’ng empleyada nga mokiha ni Tribunalo?

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: mayor

We use cookies to ensure you get the best experience on our website. By continuing, you are agreeing to our use of cookies. To find out more, please click this link.