“Asa ang crisis management sa Cebu City Hall?”

By: Lloyd Suarez March 04,2018 - 10:10 PM

SUAREZ

Mi-esplikar intawon kanako si Nagiel Bañacia hepe sa Cebu City Disaster Risk Reduction and Management Council (CCDRRMC) bahin niadtong grabeng pagkalangay pag-rescue sa nalimbuwad nga truck diha duol sa viaduct sa South Coastal Road (SRP) nga nakamugna og grabeng traffic niadtong Pebrero 28.

Nahibaw-an nga milanat og sobra 15 oras ang pagbabag sa truck sa mga motorista.

Usa sa mga mitagawtaw ug misaway pag-ayo sa pagka-inutil sa kagamhanan sa dakbayan sa Sugbo sa nahitabo mao si Julito Flores presidente sa Mini Bus Operators Association.

May ponto si Flores kay kung milihok pa unta dayon ang Crisis Management Team sa Cebu City Hall pag-abang o ba kaha paghulam og crane sa mga kontraktor dali ra untang maibot ang truck.

Apan gipasabot ni Bañacia nga miadto dayon siya sa nahitaboan.

Miingon si Bañacia nga dunay crane ang City government pero ang nakaporke lang kay tulog na ang driver ngan nga tungang gabii nahitabo ang disgrasya.

Samtang dili available ang driver sa City Hall, iyang gihangyo ang driver sa truck nga magpatabang sa ilang opisina sa trucking company o ba kaha sa iyang supervisor aron mapahawa ang truck sa kalsada.

Apan pakyas gyud kay nagtinapolan ang supervisor. Akong nahibaw-an nga daryot masumbagi ni Nagiel ang driver sa truck tungod kay nibalibad na kini nga di nila maibot ang truck.

Miingon si Nagiel nga bisag wa silay tulog naningkamot gyud nga ma pull out ang truck nga nalimbuwad.

Pagka alas 6:00 sa buntag gipa duty nilag sayo ang operator sa crane sa Cebu City Hall aron mabira ug makabangon ang truck apan dimalas lang kay samtang paingon sa nadisgrasyahan na-trap sab sa grabeng trapik sa SRP mao nga nalangay gyud pag-ayo ang pag-rescue.

Puwerte’ng paeta gyud sa kahimtang sa mga motorista niadtong higayuna nga nababoy sa ilawom sa tunnel og sobra duha ka oras nga puwerte’ng inita.

Akong nahibaw-an nga ang City government nanghatag og libreng tubig mainom kay di gyud maantos ang tumang kainit.

Ang ubang pasahero nanganaog sa ilang mga gisakyan ug nanagbaktas nalang.

Bisag kinsa niadtong sitwasyuna makasaway gyud sa gobyerno.

Kung nakatulog ang driver sa crane sa City Hall dili diay puwede’ng pukawon? Wa bay laing driver nga makamao? Pang hire mo daghang crane operator.

Panahon na sab nga kining mga driver nga mag-over speeding ug maglumba angay gyud ning diritsohon pag-revoke ilang mga lisensiya.

* * *

Unsa man gyud ka dagku ang sala sa duha ka mga firemen sa Bogo City Fire Station nga gipangbunalan man og baseball bat ni S/Inspector Patrick Paul Laude ilang fire chief?

Kung tinuud man nga nanag-inom ang duha ka mga biktima samtang on-duty niadtong Pebrero 17 nga sila si FO1 Jonson Toro ug FO1 Jeffrey Montebon di man tingali sibo ang klaseng silot.

Nganong wa man isyuhi og memorandum aron pa-esplikahon sa ilang pag-hubog-hubog nga maoy labing epektibo kay makapa-negatibo sa ilang 201 file?

Di sa ingon nga akong gi-tolerate ni’ng pag-inom-inom nilang FO1 Toro ug FO1 Montebon nga on-duty apan sayon ra man nga mawala ang pagkahubog aron maka responde gihapon kung dunay sunog.

Akong nahibaw-an nga puwerte’ng bun-oga sa duha ug gani milanat og upat ka adlaw nga di kalingkod gumikan kay nag-aguroy sa kasakit.

Wa magpa-korasyon ang duha ug dili intresado nga mangiha kay mahadlok ibalhin sa layo.

Maglaum ko nga imbestigahon kining maong hitabo aron madesiplina kining mga opisyal nga madagmalon sa iyang mga sakop ug aron sab intawon likayan gyud ang paghubog-hubog sa mga trabahante sa gobyerno samtang mag duty.

Kami gani nga anaa sa pribadong sector maglikay man gani og hubog-hubog kay daghan na’ng gipangtang-tang sa trabaho.

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: ANG, asa, Cebu City hall, crisis, management

We use cookies to ensure you get the best experience on our website. By continuing, you are agreeing to our use of cookies. To find out more, please click this link.