Unsa ning bag-o nga party drug nga “fly-high drug” nga binuhat sa mga sindikato nga nadiskubrehan sa Philippine Drug Enforcement Agency (PDEA) nga giingong 300 times nga sex enhancer?
Pagka-kuyaw sa ataki sa kasing ug pagkadelikado sa kidney ug atay sa maka-inom niini.
Kining matang sa party drug mao kini ang tumaron ug imnon niadtong manambong og party ug disco sama sa Santa Fe kay puwerte kaayo ang tama kay may sagol ecstasy, shabu, cialis ug viagra.
Mahal kining matang sa drugas mobalor og P3,500.00 matag capsule.
Kung nakalusot man sa merkado dinhi sa ato medyo lisud na gyud sulbaron ang problema sa illegal drugs.
Sa mga nangaging anti – illegal drug operations, minus pa ang dakop sa mga party drugs kay huyang ang intelligence network sa atong mga tinugyanan.
Gawas niini, duna pay daghang taga gobyerno nga traydor sa krusada ni Presidente Duterte.
Wa koy supak kung i – ban sa gobyerno ang tanang party-party ug disco kay dinhi ma-ingganyo nga makapalit aron pagana sa kaliwat ni Satanas.
* * *
Ambot kung unsa ka tinuud kining impormasyon nga atua na sa gawas sa nasud si Wellington Lim kay nakit-an kini niadtong Lunes sa kadlawon sumad karong adlawa didto sa Mactan Cebu International Airport Authority (MCIAA) uban sa iyang anak nga lalaki.
Kung tinuud man kini, natural nalang nga maoy himoong lakang ni Wellington ug sa pamilya aron paglikay.
Unsa may kalambuan sa imbestigasyon sa National Bureau of Investigation (NBI) nga maoy gidangpan sa banay’ng Lim?
Hangtud karon tak-om pa ang pamilyang Lim sa nahitabong pag-pangrakrak. Wa pa matino kung unsay klaro nga motibo sa krimen.
Bisan ang giingong pagkalambigit ni Peter Lim sa illegal drug operations lisud pa gyud isumpay ang pagrakrak kang Wellington ngan lagi nga wa maapil sa watch list sa presidente.
Si Peter Lim ray apil apan dili pa gyud gani kompirmado nga mao ba gyud kini nga Peter Lim.
Naapil man tuod ang pangan sa managsoon sa congressional inquiry sa panahon ni kanhi kongresista Antonio Cuenco apan wa gyud ma-establisar ang ilang kalambigitan kay way ebedensiya.
Kadtong ilang mga former employees nga napatay sa managlahing krimen nga sila si Bernard Liu ug Ananias Dy mao ray naunay sa tari sa ilang pag-testify batok sa Lim brothers kay mao na hinoon ang gipangkiha ug gipangpriso.
Kung mo-imbestigar man ang NBI sa nahitabong pagpangrakrak mas maayo tingali nga i-revisit sab kung wa ba gyu’y ebedensiya batok sa mga Lim aron matubag ang tanang gumunhap.
* * *
Makalagot ug makapungot gyud ning mga kawatan ug mga sagbot sa katilingban kay wa gyu’y respeto sa pag-obserbar sa Simana Santa.
Niadtong Huwebes Santo atol sa Visita Iglesia diha sa Mount Carmel Parish sa University of San Jose Recolletos (USJ-R) diha gyu’y sakyanan nga SUV nga biktima sa pagpanglungkab.
Sobrang kompiyansa sa tag-iya ug mga sakop sa pamilya kay didto nila gi-parking sa ngit-ngit nga lugar sa Leon Kilat Street sa back gate sa USJ-R samtang nanaka sila sa simbahan.
May mga nakasaksi nga paspas kaayong nakalungkab ang kawatan.
Angay ning subayon sa atong kapolisan sa Carbon Police Station kung dili ba kadto mga sakop sa gitawag og “bukas kotse gang”.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
