Golden showers

By Gerard Pareja April 15,2018

Gerard Pareja

Si Donald Trump nga president karon sa US maoy executive producer sa Miss Universe niadto. Iya lang kining gibuhian pagka 2016 human mihulga og boycott ang mga nasud nga Latino. Dili na kuno sila mangapil kon siya gihapon ang mopadagan niani.

Nanuyo ang mga Latino tungod sa iyang giluwatan nga pulong sa iyang pangampanya diin miingon siya nga drug traders ug mga rapist kining mga Mexicano.

Ug nga tungod niini, mipadayon si Trump, gikinahanglan gayud mga koralon ang border sa US ug sa Mexico para dili na makasulod sa ilang nasud kining mga dautang binuhat.

Niadtong 2013 didto sa Moscow gihimo ang tinuig nga Miss Universe pageant.

Ang Miss Philippines niadtong tuiga nga si Ariella Arida maoy nahimong third runner-up. Ang taga Venezuela nga si Gabriela Isler maoy nakakuha sa korona.

Isip executive producer, miadto si Trump sa maong pageant. Didto gi-entertain siya sa mga Russian. Gidala siya sa mga lainlaing kalingawan sa Moscow.

Gipakita siya sa mga tagadidto sa mga talagsaong pasundayag. Usa niani mao ang “golden showers.”

Si James Comey, FBI director, nga gitawag sa iyang mga critic og “Kulang sa Pansin (KSP)” ug nga usa sa gibasul sa kapildihan ni Hilary Clinton kang Donald Trump pag presidente sa ilang nasud nakigkita kang Trump sa White House human kini makadaug.

Nianing maong panagtagbo gisultian ni Comey si Trump nga dunay posibling ipangbulabog kaniya ang Russia.

Usa niani mao ang gihugonhugon nga video diin makita siyang gatan-aw og “golden showers.”

Ang golden showers, matud pa, usa ka pribadong pasundayag diin dunay mga Russian prostitutes nga mag ihianay sa ilang mga kauban. Tungod kay blonde man ang kasagaran kanila ug nga yellow usab ang color sa ihi, gihinganlan ang maong pasundayag og golden showers.

Natarantar si Trump niani. Dili kuno kini tinuod. Wala kuno sa iyang hitsura ang mangitag kalingawan sa mga burikat.

Nakuyawan siyag moabot kining maong hisgut-hisgut ngadto sa iyang asawa. Iyang giingnan si Comey nga maayong imbistigahon kining maong pasangil.

Nangutana si Comey kang Trump kon gusto ba niya kining ipahimo.

Miingon si Trump nga kinahanglang iprobar sa FBI nga wa kini mahitabo.

Apan miingon si Comey nga lisud imbistigahon ug iprobar ang butang nga wa mahitabo.

Nagkanayon kini nga unsa may imbistigahon nga matud pa ni Trump wa man kini mahitabo.

Wala madugay human ning maong panagtagbo gitangtang ni Trump si Comey sa FBI.

Ug migawas lang kining sugilanon sa “golden showers” karon kay gihisgutan man kini ni Comey sa iyang libro nga “A Higher Loyalty” nga bag-o lang migawas.

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.