Makapa-alarma na gyud karon dinhi sa Sugbo ang pagkuyanap sa sakit nga HIV / AIDS.
Si Dr. Rene Joseph Bullecer presidente sa AIDS Free Philippines, mitug-an nga karong bag-o dunay duha ka mga batan-on ang nangamatay sa maong sakit dinhi sa dakbayan.
Ang usa nag-edad og 19 samtang ang lain 26 anyos.
Si Jun Salgado sa IPHO – Capitol, in-charge sa programa sa HIV / AIDS mitug-an nga sa miaging tuig (January – December ) nakatala ang ilang opisina og 700 kapin ka mga nag-positibo.
Iyang gikompirmar nga dunay daghang mga piniriso sa Cebu Provincial Jail (CPDRC) ug sa Cebu City Jail ang nataptan.
Ang male to male sex ug ang paggamit sa ginadiling drugas maoy nag-unang hinungdan.
Ang Pilipinas maoy pinakataas og HIV infection rate sa Asia Pacific diin misaka na kini sa 140 porsiento nga nagpasabot nga matag adlaw dunay 31 ka mga bag-ong kaso sa HIV / AIDS.
Nahibaw-an sab nga sa miaging Marso, dunay 106 ang nataptan gumikan sa paid sex.
Ang bugtong paagi ra gyud ning tanan aron makalikay mao nga di gyud mo- indulge sa pre- marital sex unya kung minyo adto ra gyud sa bana or asawa.
* * *
Mag tulo na ka buwan ug duha ka adlaw karong adlawa sukad gi-ambush patay si Ronda Vice Mayor Atty. Jonnah John Ungab diha duol sa Cebu City Hall of Justice sa Qimonda Building.
Kumusta na iyang kaso? May kaugmaon pa ba nga masulbad?
Asa naman ang gi-umol nga task force? Naglihok pa ba?
Nahinumdom lang pud ko pagtikdol sa pagpatay ni Atty. Ungab kinsa legal counsel ni confessed drug lord Kerwin Espinoza kay ang awto nga iyang gisakyan atol sa krimen nga Suzuki Kizashi anaa kini karon nakaparking sa kalsada paingon sa among complex sa GMA-7 Cebu.
Akong nahibaw-an nga didto gi-parking ang maong sakyanan kay anaa didto nagpuyo ang ilang mekaniko.
Wa mosugot ang pamilya ni Atty. Ungab nga adto ayohon sa ilang garahe kay sakitan nga magtan-aw.
Sumaa sa mekaniko nga di na mo-andar ang sakyanan nga push button ang operation kay ang usa ka remote naguba human gipadala sa lubong samtang ang usa ka remote na-missing,
Matud pa lagi, gipakoykoy pagbalik ang remote nga gipadala sa lungon apan wa na gyud kini mogana.
* * *
Gidimalas gyud ang BOPK diha sa Duljo Fatima kay ang “rule of succession” ubos sa Local Government Code maoy mo-prevail.
Balik gyud si Kapitan Elmer Abella kinsa maoy 1st councilor sa bag-ong eleksiyon nga ubos sa Team Rama.
Dunay mga diskontento ug mipadayag nga dili gyud makiangayon ang “rule of succession” sa nahitabo ni Captain elect Joel Ycong.
Ang maayo kuno unta nga ipuli sa iyang katungdanan mao ang iyang asawa o ba kaha anak o ba kaha ang i-rekomendar sa BOPK kay aron sab makatilaw sa nagasto ug hinagu-an sa ilang kaduagan.
Gawas pa sab matud pa, unfair kini nilang mga botante.
Pero unsaon man lagi kay mao may balaud. Mao nay giingon nga wa tay mahims.
In fairness sa author ning balaura, maayo sa’ng pagkatoon tungod kay dinhi gi-apply nga non-transferrable o dili gyud mabalhin ang kina-iya ug abilidad sa tawo.
Kay kung sakop sa pamilya ni Ycong maoy palingkuron o ba kaha sakop sa BOPK unfair gihapon sa mga botante kay dili man ilang pinili.
Sa sunod aron patas, mas maayo tingali nga duna gyu’y special election ilabina niining hitaboa nga wa pa gyud intawon kalingkod ang namatay nga kandidato.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
