Lloyd Suarez
Simbako intawon labngon og pito ka lawod nga matinuud ang bahad sa mga mag-strike nga mga trabahante sa Visayan Electric Co. (Veco) nga dunay mahitabong total blackout sa Sugbo tungod sa ilang panagbangi sa management.
Paeta gyud kung may total blackout kay apektado kitang tanan ilabina ang mga negosyante. Guba atong ekonomiya.
Sila si Rolando Jimenez, president sa union, Arnel Zapanta, vice-president ug ilang Visayas coordinator nga si Casmero Mahilum nagkanayon nga kung madayon ang ilang ilusad nga welga karong petsa 13, dunay mga technical nga aspeto sa operasyon nga ma inutil gyud tungod kay ang ila ra’ng mga kauban nga kawani nga sakop sa union mao ray dunay kahibawo pagsulbad sa mga problema sa supply sa koryente.
Apan ang management sa VECO, misaad sa mga konsumidor nga dili gyud maapektohan ang ilang operasyon kay dunay mga contingency plan nga gi-andam.
Maglaum lang ko nga madala sa dialogue ang kasungi-an tali sa mga empleyado ug management aron dili kita mangahasol.
* * *
Ambot kung unsa ka tinuud kining akong mga nasagap nga impormasyon nga dunay pundok sa mga pulis dinhi sa Sugbo nga maoy hitman ug sakop sa gitawag og vigilantes group nga maoy mopatay niadtong mga nalambigit sa illegal drugs?
Ambot kung unsa sab ka tinuud nga dunay mga drug lord nga nagtukod og ilang liquidation squad nga gilangkuban sa mga aktibong pulis ug mga ex-police aron maoy molutos niadtong mga nagtinarong nga mga otoridad?
Kung tinuud man kini, mahitabo gyud nga mag-unay ang atong mga tinugyanan sa balaud.
Ang kuyaw kung maglumba lang sa pagtanom og illegal drugs human mapatay ang ilang mabiktima aron dauton ang pagkatawo.
Kung tinuud man nga taga gobyerno ra ang mga sakop sa vigilantes ug maoy responsable sa sunod-sunod nga patay, lisod gyud pagsikop ug kuli nga kahatagan og hustisya ang nabiyaan nga mga pamilya.
In fairness sa mga kadagkauan sa Philippine National Police, pulos nanghimakak.
Si Cebu City Police Director S/Supt Royina Garma mihagit pa kang Cebu City Mayor Tomas Osmeña pagpamatuud ning tanan.
Niadtong Sabado sa among programang “Dialogue On The Air” sa DYSS Super Radyo, giklaro usab nila ni Supt. Reyman Tolentin, Supt. Artemio Ricabo Jr., Supt. Janet Rafter, Supt. Marlu Conag ug C/Ispector Junne Caadlawon nga dili gyud tinuud kining tanan.
Gisalindot usab nila ang pasangil nga hitman si late PO3 Eugene Calumba kadtong napusilan patay sa bodyguard ni Tejero Barangay Councilor Jessielou Cadungog nga si William Macaslang Jr.
Apan dili kalikayan nga dudahan ang PNP nga maoy responsable tungod kini sa seryosong kampanya ni Presidente Duterte batok sa illegal drugs.
Kung tinuud man nga dunay mga vigilantes group nga naglihok dinhi sa Sugbo, pila man gyud kini ka grupo?
Tinuud ba kini nga ang hitman hatagan og 150 mil pesos kada ulo sa mapatay nga ordinaryong tawo, unya tunga sa milyon ngadto usa ka milyon kung daku og rangggo ang mapatay?
* * *
Kinahanglan sab gyud nga atong ilhon, pasalamatan ug suportahan ang atong kapari-an nga nangalagad og tinarong sa ilang tagsa-tagsa ka parokya.
Sama pananglit sa among parokya sa Saint Therese sa Barangay Lahug nga ubos karon sa pagdumala sa Team Moderator nga si Monsignor Roberto Boy Alesna.
Angay gyud silang pasalamatan og daku ug daygon kay milambo pag-ayo ang Simbahan.
Ang mga sakop ni Monsignor Boy mao sila si Monsignor Achilles Dakay, Padre Eduardo Cabog, Padre Ike Herrera ug Padre Dave Cantillas.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
