Imbistigahon ang mga landslide aron makapasikat?
SUAREZ
Unsa may tuyo ug tumong niining ipahigayon nga House congressional hearing ug Senate inquiry sa nahitabong landslide sa Naga Cebu ug Itugon Benguet nga namatyan og daghang kinabuhi?
In aid of legislation or in aid of reelection sa atong mga maayong laki nga mga sakop sa kongreso?
Sa tinuud lang nawad-an nako’g pagsalig niining mga ilusad nga Senate investigation or House inquiry kay maglumba’g grandstanding o pasikat lang kining atong mga magbabalaud.
Kung seryoso gyud nga dunay manubag sa maong mga panghitabo mas maayong idirekta ang pagpasakag kaso sa korte batok sa mga responsable ug nagpabaya.
Nakabasa nako sa script niining tanan ilabina ang nahitabo sa Naga nga mag-iyahay sa pagpanghinaw ang taga Mines and Geosciences Bureau DENR-7, Apo Land Quarry Corp. ug mga opisyales sa Naga.
Ang posible’ng mahitabo mao nga tuison pa ang estorya unya ang namatyan pay basolon sa gobyernong haguka nganong mipuyo didto nga risgo kaayo.
* * *
Magduda man sab hinoon ko nga mga pulis ray nagpatay niadtong lima ka mga biktima sa Ayala Heights sa Barangay Malubog niadtong Huwebes sa kadlawon tungod niining mga actuations ug body language ni PRO-7 Regional Director Debold Sinas.
Overacting ra kaayo si Sinas atubangan sa mga police beat reporters nga nanghimakak sa krimen ug misuway pagtuis sa direktang akusasyon sa usa sa mga survivors sa rubout nga si Charmaine Puran nga hugtanong namasangil nga pulis-SWAT ang mga responsable.
Gipalutaw man gud ni Sinas nga wa gyud motabi ug namasangil sila si Puran ug laing survivor nga si Antonio Ruiz Belande ngadto sa media nga pulis ra ang responsable.
Kung intresado si Sinas sa mga interview sa media ngadto sa duha mas maayong iyang kopyahan.
Ambot kung nakapaminaw ba si Sinas sa mga interview or nagpabungol-bungol lang?
Atong ibutang nga wa siya kadungog, apan normal gyud nga mahadlok kang Sinas ang mga naka survive kay tingalig tiwasan.
Gani kadto si Charmaine didto misakay sa among sakyanan kay hadlok gyud siya sa patrol sa pulis.
In fairness sa lima nga nangamatay nga silang Carl Cabahug, 26, taga sitio Camansi, Barangay Lorega San Miguel; Leyster Abella, 26, taga Lucio Drive, Calamba; Rolando Tayor, 29, taga A. Lopez, Barangay Labangon, Diorvan Sanjorjo ug Christopher Tangag pulos dili na maka depensa.
Posible man gani nga kadtong duha ka habal-habal driver nga naapil sa pagpangrakrak-patay pulos kadto mga inosente ug igo ra’ng nasabit.
Tan-awon nato kung maka-sustiner ba ang teyoriya ni Sinas nga sindikato ra gihapon sa illegal drugs ang responsable sa krimen.
Apan dili gihapon kalikay si Sinas sa pasangil nga mga pulis ang responsable tungod kay tinuud man kaha nga daghang pulis nga aktibo pa sa serbisyo nga atua nakapusta sa sindikato.
Kumusta man ang ilang internal cleansing?
* * *
Bulok gyud ning prinsipyo sa gobyerno kay dunay mga hinabang nga gilangkuban sa upat ka container van gikan sa lain-laing mga nasud niadtong 2014 alang unta sa mga biktima sa bagyong Yolanda ang gipangsunog kay dili na kapahimuslan.
Ang rason nga natanggong diha sa Bureau of Customs tungod kay wala mangayog exemption sa Department of Finance sa mga bayranan ang mga consignee.
Wa gyud mangita og paagi ang Aquino administration kaniadto nga makig-coordinate sa mga consignee aron kapahimuslan unta sa mga biktima? Paeta gyud!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
