‘Tulo ra ang mopaso sa TCC?’

“Mabayot ko buang ug mabuang ko bayot” niining nahitabo karon sa Talisay City College.

Sa laktod nga pagka-estorya makalibog gyud kay way “word of honor” o “way palabra de honor” si Talisay City Mayor Johny Delos Reyes.

Wa gyud siya motuman sa iyang saad sa mga estudyante, sa mga ginikanan ug sa publiko aron paglikay unta sa kalibog ug aron dili ma-hostage ang mga estudyante sa technicality nga usa ra ka petsa ang graduation niadtong March 26 alang sa 720 ka mga tinun-an sa Talisay City College.

Nakadayeg na unta ko sa iyang pagpa-ubos sa garbo human siya misuporta sa March 26 nga graduation ug miingon pa siya sa akong interview nga iyang ipakanselar ang graduation nga gitakda karong adlawa, March 31, nga gi-schedule ni Dr. Paulus Mariae Canete.

Siyempre makahatag kini ug kalibog ug makapa-hostage kini sa sitwasyon. Kung akoy estudyante mapugos gyud pagpaso ug balik paglikay sa technicality.

Si Mayor JVR mi-esplikar kanako nga ipadayon nalang ang graduation karong adlawa kay iyang nahibaw-an nga dunay usa ka gatos kapin sa mga tinun-an ang wa makapaso niadtong petsa 26.

Gawas pa dunay giingong “manifesto” nga pirmado sa mga estudyante nga mag-graduation gyud karong adlawa.

Pero ang registrar sa TCC nga si Loulette Zafra nga miadto niadtong Biyernes sa gabii sa akong programa sa DYSS uban sa mga teaching and non-teaching staff sa TCC ug sa mga ginikanan ug mga estudyante miklaro nga dakung bakak ang gidaghanon nga nakuha ni Mayor JVR sa wa makapaso kay ang tinuud tulo ra gyud ang wa mopaso niadtong March 26.

Ang mga estudyante nga wa makapaso kay ang ilang dughan pabor nilang Canete mao sila si Mark Booc, Brian Minoza ug usa ka nag-apelyedo ug Perez.

Gawas pa namasangil ang mga tinun-an nga gilipat-lipat sila pagpapirma “ sa manifesto kay nagtoo sila nga usa lang kadto ka attendance.

Pero si Mayor JVR nga mi-react via telephone mipadayag nga dili angay’ng mabalaka kadtong nakapaso na pagka-petsa 26 kay legal sab kadto ug puwedeng dili na sila mopaso pagbalik.

Miingon ang mayor nga bahalag kadto rang tulo ka mga tinun-an ang mopaso ila gyung idayon.
Alang nako, dili naman siguro obligado ang gobyerno sa tulo ka mga tinun-an pagpahigayon ug special graduation kay ila man kadtong sayop kay nagpagamit man sa pulitika.

Nawala akong bilib ni Mayor JVR niining iyang pag-usab-usab ug desisyon nga maayong pagka-galgal sa mga traydor sa partido.

Abi ba nako nga tarong ika-estorya si Mayor JVR. Madiktahan paman diay gihapon siya ni Dr. Canete nga intresado kaayo sa TCC. Dunay bulawan diha sa TCC?

Kung magpirmi ni diha sa TCC nga way klaro, manawagan nalang ko sa mga tinun-an nga hinay-hinay mo ug balhin sa laing kolehiyo ilabina nga misamot kainit karon ang pulitika diha sa dakbayan sa Talisay.

* * *

Mitiyabaw intawon ang mga trabahante sa korte karong bag-o kay wa sila maapil sa libreng parking diha sa Qimonda IT Center ug magbayad sila ug tag 20 pesos matag adlaw sugod ugma Abril 1.

Sa memorandum ni RTC Executive Judge Soliver Peras niadtong March 24, nagpasabot nga sila ra’ng mga huwes ug mga clerks of court ang maka-avail sa free parking privilege.

Sa samang memorandum, gimanduan niya ang mga huwes ug mga clerks of court nga ipakita lang sa guwardiya sa entrance ang ilang ID nga giisyu sa Korte Suprema.

Ang mga kawani misugilon nga misamot kalisud ang ilang kahimtang niining ilang pagbalhin sa Qimonda kay mao pay layo, gagmay silag suweldo ug nimahal ang gasolina unya pabayron pa sila sa parking.

Siyaro sab kung di makahangyo si Judge Peras nga ilibre nalang ug apil sa parking ang mga kawani sa korte ngan nga mahal ang abang sa Korte Suprema nga mobalor ug dul-an 2 million pesos matag buwan.

Maayo sab tingali nga tun-an ni Judge Peras kung dili ba risgo nilang mga huwes ang ilang parking area nga visible kaayo sila sa gawas sa building.

Mas maayo sab tingali nga di sila mokompiyansa niadtong mga mag-motor nga way klarong business sa korte ug sa MARINA.

Kinahanglang makamao gyud nga mosita ang mga guwardiya uban sa kapolisan nga anaa nadestino diha sa Qimonda.

* * *

Bilib ko sa basketball team sa CCTN-47 kay ang ilang “fighting five” mipilde gyud sa among team sa GMA/DYSS Super Radyo kagahapon sa semi-finals sa Newsmen Basketball Association (NBAC) sa Cebu Eastern College (CEC) gym.

Karong Domingo among suwayan pagpanimawos sa CCTN-47 alang sa rematch sa twice to beat situation. Kung kami ang suwertehon kami maoy mo-away sa TV-5 nga waiting na for best-of-three championship series human milampos sila pagpilde sa Sunstar/Bombo Radyo/Brigada News sa 2nd game kagahapon.

Pero kung mapilde gihapon ang among team karong Domingo, ang CCTN-47 ug TV-5 maoy magsangka sa finals samtang ilogan namo sa Sunstar/Bombo Radyo/Brigada News ang 3rd place niining maong NBAC tournament.

Again salamat gyud kaayo sa management sa CEC nilang Sir Jeff Go, Sir Sammy Sia ug Sir John Maraat ug ingon man kang Sir Chester Cokaliong sa Cokaliong Shipping Lines sa kanunay’ng suporta sa NBAC nga gilangkuban sa mga front liners sa news and commentary sa media industry dinhi sa dakbayan sa Sugbo.

TAGS: