Kudos sa kapolisan sa Guindulman, Bohol nga maoy nakapatay kang Artemio Tare nga unang nakapatay ni PO1 Michael June Ejoc ug naka-angol sa laing tulo ka mga kaubang pulis sa Bohol Provincial Intelligence Branch ug sa Provincial Anti-Illegal Drugs Special Operation Task Force didto sa Poblacion, Tagbilaran City sa miaging semana.
Pwerte gyud diay ka agresibo ni Tare kay nakapusil pa gyud ug laing duha ka mga pulis nga sakop ni S/Inspector Joemar Pomarejos sud sa bus nga gisakyan niini samtang gisita sa kapolisan sa Guindulman.
Ang pagkapatay ni Tare resulta sa pagtinabangay sa mga tarong ug ligdong nga mga pulis sa Bohol.
Nindot kini nga mensahe batok sa mga drug lords. Mapatyan man tuod ang kapolisan sa krusada apan dili sila kahurot sa pwersa sa gobyerno.
Congrats sab sa grupo nilang Supt. Rodulfo Albotra sa Cebu Provincial Intelligence Branch nga milampos sab pagpatay kay misukol ang giingong level 2 drug pusher sa Yati, Liloan nga si Noel Codinera nga miresulta sab sa pagkadakop sa walo ka mga kauban ug nakasakmit silag shabu nga mikantidad ug 2 milyones ka pesos, mga armas, granada, kwarta ug uban pa.
Maglaum ko nga naa pay daghang police operations ug marumbo kining sindikato sa drugas nga maoy nakaguba sa kinabuhi sa kadaghanan.
* * *
Makapalagot kaayo kadtong pagpamusil-patay ni Poblacion, Alcoy Councilman Ciriaco Romarate Delos Santos ngadto sa hepe sa kapolisan nga si Inspector Crisanto Abella.
Inay magtinabangay sila sa kaayohan ug kalinaw sa Alcoy ilabina nga pulos sila mga pulis, nagpinatyanay hinuon.
Kinahanglang imbestigahon ang mga sakop ni Abella nganong wa makabaws ngadto sa abusadong konsehal – sila si PO2 Wilt Harris Almagro, PO3 Eduardo Santander, PO2 Howard Maynopas ug uban pa.
Mibahag ang ikog sa mga sakop ni Inspector Abella kay ig-agaw ni Alcoy Mayor Nicomedes Delos Santos ang barangay councilman nga responsable sa krimen?
Nahadlok sila sa konsehal nga giilang bagsik ug kanhi kauban nilang pulis?
Daghan kog nadawat nga mga negatibong isyu batok ni konsehal Delos Santos.
Panahon na nga motingog ang mga dinaug-daug niining maong konsehal aron mataral ug madugta kini sa bilangguan.
* * *
Usa ka dakung kadaugan namong mga sakop sa media kining pagka-suspenso ug unom ka buwan nga way sweldong madawat ni Philippine Drug Enforcement Agency (PDEA)-7 Deputy Regional Director Esperidion Javier sa iyang pagpanghagit kaniadto ug pinusilay sa among reporter sa DYSS Super Radyo nga si Guam Logroño.
Ang binuhatan ni Javier maoy nakapatukmod sa iyang pagka-konbikto sa mga kasong administratiba nga kasong conduct prejudicial to the best interest of the service ug kasong simple misconduct.
Wa magsilbe ang mga depensa ni Javier kay daghan sa among kauban sa buhat ang mitestigo batok sa iyang pagka-abusado.
Si Javier buot unta kining makig-settle kang Super Guam pinaagi sa pagbayad apan wa gyud siya molampos kay gusto gyud nga ma-disiplina ug matul-id kining mga klase sa opisyal sa gobyerno kay kuyaw kung magdaghan ang makig duwelo kung maapiki sa isyu nga ibato sa reporter.
* * *
Kinahanglan pa ba nga putlon gyud ang dos mil kapin ka mga puno-an sa kahoy dinhi sa dakbayan sa Sugbo aron pagpatuman sa P 10.6 billion nga Bus Rapid Transit (BRT)?
Makahasol ba ang mga kahoy sa BRT? Babag ba ang mga puno-an sa kalamboan sa harang dakbayan?
Wa koy pagsupak alang sa kalamboan dinhi sa ato pero kinahanglang tun-an gyud ug tarong aron dili ta magyagaw.
Ang akong punto sama ra sa isyu sa mga century-old nga mga acacia didto sa Naga paingon sa Carcar nga kadto rang mga delikado ug risgo sa publiko ang angay’ng tag-on.
Kung gikinahanglan gyud nga malimpiyohan sa mga kahoy ang agi-anan sa BRT gikan sa Bulacao paingon sa Talamban, di lang siguro putlon. Kung mahimo lukahon lang ug ibalhin sa laing mga lugar.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
