Sa lima ka mga sunod-sunod nga lungkab sa mga treasurer’s office sa Sogod, Compostela, Carmen, Pinamungajan ug dakbayan sa Toledo, usa pa ang nasulbad sa kapolisan.
Niadtong Sabado sa hapon atul sa among programang “Dialogue On The Air” sa dySS Super Radyo, gikonsiderar nilang Supt. Paul Labra II sa Regional Intelligence Division sa Police Regional Office 7 ug sa mismong hepe sa Pinamungajan nga si S/Inspector Ruben Verbo Jr. nga considered closed na ang kaso kay ila nang gipasakaan ug kasong robbery with force upon things ang utility worker sa Pinamungajan nga si Jose Ordines ug laing duha nga wa pa mailhi.
Ang hepe miingon nga lig-on ilang kaso batok sa utility worker kay maoy nakit-an sa conductor ug driver sa Ceres Bus nga maoy miguba sa pultahan sa municipal building niadtong kadlawn sa Agosto 31.
Sa Toledo incident, naglabad pa ang ulo sa hepe nga si Supt. Ricky Delelis apan duna na silay suspect. Sama ang Toledo sa mga lungsod sa Compostela, Carmen ug Sogod nga padayon pa’ng gi-imbestigahan.
Maglaum ko nga masulbad ning tanan aron mawagtang ang mga pagduda nga gibulsa ra ang kantidad sa mga dagku’g ranggo.
Unsa kaha kung mahitabo ang lungkab sa Kapitolyo, Cebu City Hall ug Talisay?.
Si S/Supt. Noli Romana misaad nga kung malungkab ang City Hall dili siya magdugay pag-resign. Pero iyang gipaniguro nga dili gyud mahitabo kay naay mga pulis ug dunay CCTV.
Mao sab sa Talisay City Hall nga gipaneguro ni Supt. Carmelo Dayon nga di gyud malungkab kay lig-on kaayo ang security sa building.
Pero di gyud ka siguro ang atong kapolisan sama ni Romana kay halos tanang insidente pulos inside job.
Ang kakuwang sa sweldo ug sa kalisdanan sa pag-puyo sa usa ka trabahante sa gobyerno mao nay basihanan sa kapolisan nga suspect sa lungkab?
* * *
Si Capitol Chief Security Officer Loy Madrigal ra ba diha sa Kapitolyo ang mi-aringkingking?
Limpyo ba sab si Medellin Mayor Ricky Ramirez nga maoy mi-post sa Facebook sa iskandalosong hulagway ni Madrigal nga nagpa-uraray iyang secretary nga nakuha didto sa terminal sa Ninoy Aquino International Airport?
Dili bastos tan-awn ilang picture apan nahug sa panultihon nga “actions speaks louder than words” nga may relasyon gyud sila. Butang nga wa palabya ni Governor Davide ug gipangmanduan nga mang-resign silang duha.
Wa ko matingala ni Madrigal nga wa gyud moangkon sa iyang relasyon kay nasayod siya sa mga legal implications ilabina nga wa pa ma-annulled ang kaminyoon sa iyang secretary kay pwede silang gukdon sa bana sa kasong concubinage ug adultery.
Dili na sab ko motuo ni Gov. Junjun nga iyang bakwi-on iyang mandu nga kinahanglang mang-resign silang Madrigal kay mahug ta anang way baruganan.
Kung mo-insister si Madrigal nga dili sila mang-undang sa trabaho ug dili mang-resign kay wa silay relasyon kinahanglang maka-depensa siya ug tarong nga di maulawan ug samot ang babaye.
Unsa man gud ang iyang gikawid-an sa iyang mga gipanghuptan nga mga katungdanan nga segurado man ko nga makakita pa si Gov ug mas competent pa niya.
Unsay pagtuo ni Loy, siya ray makama-o sa trabaho?
Kung may nahibaw-an si Loy nga dunay laing opisyal sa Kapitolyo nga parehas niyag binuhatan mas maayong iyang i-report ni Gov aron kalimpyohan ang ilang administrasyon.
Ang bisyo maoy sukaranan sa corruption.
* * *
Kinsa man sa tulo ka mga lady prosecutors ang molampos paglangkat sa gi-biyaang trono ni Cebu City Prosecutor Nicolas Sellon?
Si Assistant City Prosecutor Aida Sanchez nga nagsalig sa Ginoo ug maoy most senior prosecutor?
Si Assistant City Prosecutor Liceria Lofranco Rabillas nga maoy gi-endorso ni Cebu Governor Hilario Davide III? O ba kaha si Assistant City Prosecutor Mary Ann Castro nga wa maapil sa unang batch sa promotion?
Akong mga tinubdan si piskal Castro maoy pinaka-qualified niining mga higayona ug sa mosunod nga unom ka buwan kay sila prosecutors Sanchez ug Rabillas bag-ong na-promote pagka prosecutor II.
Sa lagda dili pwedeng hatagan ug duha ka promotions ang usa ka piskal sulod sa unom ka buwan.
Akong mga tinubdan misugilon nga si piskal Sanchez mi-atras sa karera pagka Cebu City Prosecutor kay wa siya’y political backer ug matud pa dili kaya ang kinamangay pagpangita ug padrino sa Malacañang.
Wa pa gyud mawagtang ang “padrino system” sa Malacañang bisan administrasyon na ni presidente Noynoy Aquino?
Unsa ka tinuud nga kining tulo ka mga contender wa na mag-tinganay kay nag-ilog sa puwesto?
* * *
Congrats sa akong mga ka teammates sa Palace of Justice ug Capitol Beat Reporters kay kami ang makig-tigi sa mga tigbalita sa Cebu City Hall alang sa championship sa volleyball tournament sa Cebu Press Freedom celebration human milampos kami pag-pilde kagahapon sa mga tigbalita sa kapolisan, military ug sa ubang law enforcement agencies diha sa Cebu Eastern College.
Tungod sa mga resulta sa duwa kagahapon, kanselado na ang schedule karong Sabado petsa 20.
Mo-resume mi pagduwa karon nang petsa 27 nga adlaw’ng Sabado nga maoy culminating activity diin mag-away alang sa 3rd place ang combined team sa mga tigbalita sa Talisay, Mandaue, Lapu-lapu ug sa mga regional offices batok sa mga reporters sa PNP, military and other law enforcement agencies.
Second game mao na ang among championship.
Again salamat gyud kaayo sa management sa CEC ug sa Coca Cola Bottlers Philippines sa pagsuporta ning maong liga alang namong mga sakop sa media.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
