Kapitan ug tanod apil sa ilegal

By: Lloyd Suarez October 20,2014 - 09:17 AM

Kung magbaton lang gyud ug kaisog, dedikasyon ug teamwork ang atong mga otoridad taliwa sa risgo sa trabaho nga ilang gi-atubang, molampos gyud pagpuhag batok sa mga pundok nga sindikato nga responsable sa paghimog krimen ilabina sa pagpalusot ug pagpamaligyag drugas.

Daku kaayo kog pasalamat sa atong kapolisan nga milampos gyud pagronda sa mga drug personalities sa mga bukirang barangay didto sa amo sa lungsod sa Dalaguete ug sa silingang lungsod sa Alcoy gikan niadtog Biyernes sa buntag hangtud pagka Sabado nga miresulta sa kamatayon sa tulo ka mga targets ug pagkasikop sa napulo ka mga suspetsado.

Ang nakanindot kay wa mapatyi ang habig sa atong kapolisan nga gilangkuban sa Regional Intelligence Division (RID)-7 nga gipangulohan ni Sr. Supt. Paul Labra II, Regional Anti-Illegal Drugs Special Operations Task Group (RAIDSOTG)-7 pinangulohan ni Supt. Marvin Sanchez ug Provincial Intelligence Branch sa CPPO pinaagi kang Supt. Rodolfo Albotra.

Alangan magpa-alkanse ang atong kapolisan nga nanukol man ang nangamatay nga sila si Jojo Ganolon ug Jelon Mercado, pulos taga barangay Nalhub, Dalaguete ug Lorenzo Coronel nga taga Nug-as, Alcoy nga pulos nakabaton ug high-powered firearms.

Kinahanglang imbestigahon ug tun-an sa PRO-7 kung angayan bang kasohan si Nalhub Barangay Captain Riza Ganolon Amandoron, kung wa ba kini mag-protihir sa drug operation sa napatay niyang pag-umangkon nga si Jojo ug sa iyang bana nga nadakpan ug apil nga si Erwin.

Nagpakita lang gyud kung unsa na ka grabe ang paghitak sa shabu sa Dalaguete ug Alcoy kay dunay barangay tanod sa Jolomaynon, Dalaguete nga si Lucino Quivido ang naapil ug kasikop sa joint operations.

Again, congrats sa atong kapolisan nga wa nay kahadlok nga makigharong batok sa mga dautan. Pun-i pa ninyo!

* * *

Makaluya ang gitribukar ni Robinson Jorgio, officer-in-charge sa Philippine Institute of Volcanology and Seismology (Phivolcs) kinsa miingon nga daku ang posibilidad nga tay-ogon kita ug laing mas kusog sa 7.2 magnitude nga linog sa mosunod nga mga tuig.

Gani matud niya atul sa among programang “Dialogue On The Air” sa dySS Super Radyo nga hangtud karon maka-rehistro pa sila sa Phivolcs ug 2-3 ka mga aftershocks matag adlaw.

Si Jorgio nanawagan nga kinahanglang palig-onon ang mga panimay ug usbon na ang mga paagi sa construction industry nga maka-kaya gyud ang edipisyo bisag mo-igo ang 9 magnitude.

Pero nakatawa mi ni Architect Danilo Lim sa Office of the Building Official sa Cebu City Hall kay hangtud karon way lig-ong hollow blocks or mga bricks nga gipamaligya sa mga construction supply. Mga hollow blocks karon humok kaayong mangabuak ug mangatigpod.

Sukad pa kaniadto wa gyu’y taga gobyerno nga nang-embargo niining mga low quality nga mga consruction materials.

Si Jorgio midugang nga natural gyud ang linog nga mahitabo tungod sa fault system sa Pilipinas.

Didto sa Maribojoc, Bohol akong nahibaw-an gikan kang FO2 Aristotle Descallar sa Bureau of Fire Protection nga kadtong lugar sa dagat nga nahimong hunasan wa na gyud uli-i ug nagpabiling hunasan.

Gipasabot hinoon ni Jorgio nga dili na gyud mabalik ang karaan nga sitwasyon sa dagat sa Maribojoc kay epekto kadto sa linog ug ilang nasubay nga mi-isa gyud ang Isla sa Bohol gumikan sa maong linog.

Si Descallar nga taga Maribojoc mitug-an nga daghang mga panimay didto nga misibog sa laing yuta ug nagsabot-sabot nalang ang mga tag-iya aron way away ug gani didto sa dakung hunasan dunay mga Bol-anon nga nangangkon ug naglumba pag-ukbok ug mga mohon apan nabadlong na sa taga gobyerno.

Didto gihapon sa Bohol, gitug-an ni Victor Yntig sa Department of Education-7 nga sa walo ka tunghaan nga unang gi-report sa Mines and Geo-Sciences Bureau sa DENR-7 nga may sinkhole, bugtong ang Sagbayan National High School pa ang ilang nahibaw-an kay wa sila pahibaw-a sa taga DENR sa laing pito.

Gani hangtud karon ang mga tinun-an sa Sagbayan National High School atua nila gibalhin sa Sagbayan Central.

Kumusta naman ang atong mga geologists sa DENR? Nakahuman na sila pag-inspection sa tanang eskuwelahan kung may sinkhole ba?

* * *

Abir tan-awon nato ning ongoing rehabilitation sa taga Department of Public Works and Highways (DPWH-7) sa drainage system sa barangay Lahug nga gisugdan niadtong September 17, 2014.

Maglaum ko nga human sa 60 ka adlaw nga kontrata sa Quirante Construction or inig ka Nov. 17 sulbad na ang baha sa kalsada atbang sa JY Mall.

Kung dili na magbaha nagpasabot nga wa kawkawa sa mga kawatan ang gitagana nga budget nga mobalor ug P3.7 million sa drainage rehabilitation program.

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS:

We use cookies to ensure you get the best experience on our website. By continuing, you are agreeing to our use of cookies. To find out more, please click this link.