Badlunga si Llaguno ug OSCA Mr. Mayor!

By: Lloyd Suarez October 29,2014 - 01:56 AM

Way kuwestiyon kining pag-initiate sa Office for Senior Citizen’s Affairs (OSCA) nga gipangulohan ni Mr. Rolando Llaguno nga mo-donate silang mga edaran ug kuwarta aron makatabang pagpatukod sa bag-ong Cebu City Medical Center (CCMC).

Ang nakaporke lang kay mahug kining pinugsanay kay tag 2 mil pesos matag-usa ang ipa-amot sa 60 mil ka mga sakop ang ipa-iban sa nahibiling 5 mil pesos nga kolektahon alang ning tuiga.

Sa report kagahapon, dunay 300 na ka mga miembro ang mipirma sa manifesto. Pero pila raman intawon na’ng 300 sa 60 mil ka mga sakop?

Naa ba gyu’y voluntary nga automatic deduction nga tag 2 mil pesos?

Sayop gyud ning paagi ni Llaguno. Akong subli-on nga ang nindot nga paagi mao nga ihatag direkta sa ilang mga miembo ang tibuuk 5 mil pesos ug sila nay magbuot kung pila ang i-donate ug kanus-a sila mohatag.

Prangka lang nga pagka-estoya dili parehas ug kahimtang ang tanang mga senior citizens. Dunay kabus ug dunay pobre nga makalilisang ang kahimtang.

Dunay mga edaran nga kaya kaayong makahatag ug sobra pa sa 5 mil pesos ilabina niadtong wa nay obligasyon ug pinadalhan sa mga anak gikan sa gawas.

Nganong pugson man ang target sa taga (OSCA) nga 100 million kung di makaya?

Kung seryoso sab si Cebu City Mayor Michael Rama sa iyang pagtin-aw sa isyu nga wa siya’y labot sa pag-initiate niini, nganong di man siya kabadlong nilang Llaguno?

* * *

Kinsa naman sab intawon kining gipatay ug gisulod sa malita nga gilabay sa bung-aw didto sa Sitio Visayan, Barangay Lanas dakbayan sa Naga?

Wa pa mailhi ang biktima kay anaa na sa advance state of decomposition.

Dili kaha kini usa ka bana o asawa nga nalambigit ug love triangle? Dili kaha kini ilado nga drug personality ug sagbot sa katilingban?

Lain na sab kining tutukan sa kapolisan.

Tungod kay way identity lisud pan’g determinahon kung taga asa ang biktima.

* * *

Nahinumdum ko sa akong kabatan-on niadto sa Casay Dalaguete sa nahitabo sa Argao Center for Science and Learning Incorporated nga dunay pito (7) ka mga tinun-an nga giingong nasudlan ug espiritu.
Daw makapanimbawot gyud sa balhibo kung tinuud man.

Uso kaayo ni didto sa amo kaniadtu sa Casay pero dili sa eskuwelahan.

Sa akong kabatan-on nakasaksi gyud ko nga dihay manambal nga ni-abot sa bay sa akong ig-agaw ug didto mi-perform gyud aron palayason ang mga dautang espiritu nga misulod sa lawas sa tawo.

Kulba gyuy’ng paminawon kay manggawas kining lain-laing tingog nga di masabtan ang estorya unya kusgan kaayo ang mga pasyente.

Diha sab toy higayon nga paryente namo nga manghod nako ug edad nga si Charlie nawala gikan nga nagkalos ug tubig sa walog nga kilom-kilom na didto duol sa iladong lugar nga abtanan nga gitawag ug “Bulocaue”.

Ang mga katigulangan namo niadto daw mihimog parade ug gilugsong ang “Bulocaue” ug nag-tambol ug ubang matang sa pagsaba-saba aron ipa-uli sa mga engkanto si Charlie.

Ug sa dihang mi-abot na ang lawom nga kagabhion, nakit-an nalang si Charlie sa among chapel sa may laguna nga luya na ug didto iyang giasoy nga nakasulod siya sa bay sa mga engkanto nga hilabihang daku-a ug susama ug paraiso nga puno sa mga lamiang pagka-on.

Apan sumaa pa niya wa gyud siya motilaw sa mga pagka-on ug kanunay niyang gilitok ang “asin” mao nga napugos pag-uli kaniya ang mga engkanto.

Ambot lang kung tinuud ba gyud kini. Wa pa man gud ko ka kita. Unya nako motoo inig Kalag-kalag kung pakit-on ko. Hehehe, Happy Halloween!

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS:

We use cookies to ensure you get the best experience on our website. By continuing, you are agreeing to our use of cookies. To find out more, please click this link.