Nakatawa ko sa lain-laing komentaryo ug reaction sa mga piskal dinhi sa Sugbo sa kamanduan ni Justice Secretary Leila De Lima nga dili na padawaton og allowance gikan sa mga local government units ang iyang mga piskal ug mga staff nationwide.
Dunay miingon nga ilang ipabarang si De Lima kung ipatuman gyud niya.
Ang laing piskal mi-komedya nga bahalag i-kiha siya sa kasong insubordination, modawat gyud gihapon siya ug magpatabang siya sa mga rebelde sa Mindanao.
Dunay namahayag nga si De Lima ignorante sa Local Government Code kay legal kining ilang gidawat nga allowance.
Ang usa nga nagpabiling dalaga nagkanayon nga dili siya apektado kay dili siya dako og obligasyon. Unya nagpasalamat siya sa Ginoo nga wa papas-ana og dakong responsibilidad.
Ang makaloluoy kadtong mga piskal nga way RATA ug na-destino sa lagyo’ng lungsod nga magbalhin-balhin og mga korte kay magka-gidlay gyud intawn.
Ang ubang mga piskal nagkanayon nga lisud gyud kaayo nga maibanan ang ilang na-andan nga madawat kay apil na sa budget sa pamilya.
Kagahapon, si Acting City Prosecutor Ma. Luisa Ratilla mi-klaro nga magpadayon sila pagdawat sa binuwan nga allowance samtang di pa sila makadawat sa memorandum nga pirmado ni De Lima.
Mangambot lang ko kung mo-reconsider ba si De Lima kay ang pundok sa mga piskal nga National Prosecutor’s League seryoso gyud nga ipa-reconsider ni De Lima ang iyang kamanduan.
Ang tuyo ni De Lima nga dili na padawaton aron mabalik ang pagsalig sa katawhan ngadto sa mga piskal ug aron ipatuman ang judicial independence sa Department of Justice.
Sa akong bahin, samtang dili ma-undang kining atong sistema sa pang-gobyerno nga ang presidente kinsa usa ka “political animal” nga maoy motudlo ug mga piskal, makapamikat gihapon ko niining katuyoan ni De Lima.
Kini tungod kay ang atong mga aplikante pagka-piskal ug bisan kadtong mga piskal nga nangambisyon nga mahimong Department Head moduol man gyud og politiko aron i-endorso ngadto sa presidente ug aron maoy itudlo.
* * *
Dili lisud sulbaron sa atong kapolisan sa dakbayan sa Mandaue ang pagpusil – patay sa 15 anyos nga dalagita nga si Kim Espina niadtong Sabado sa hapon nga mi-angol usab sa iyang inahan nga si Prescilla Patenio.
Daku na kaayo’g ikatabang sa atong mga otoridad ang mga posibleng motibo pagpatay sa dalagita ilabina nga si Kim maoy nagbinugtong nga sumusunod (heir) sa katigayunan sa iyang amahan nga patay na nga usa ka Japanese national nga nanag-iya og gam-anan sa mga duwa-an didto sa Japan basi sa “last will and testament”.
Dili kaha Japanese national ug kapamilya ra sa papa ni Kim ang nag-mastermind sa kremin?
Wa kahay mga kadugo ni Mrs. Patenio nga nalambigit sa daku’ng krimen dinhi sa Sugbo?
Maglaum ko nga kahatagan intawn ug hustisya ang kamatayon sa biktima.
Lisud gyud basta dunay kwarta ug katigayunan nga mahibilin sa namatay kay magpatay ang mga sumusunod.
* * *
Naghu-ot akong dughan sa mga mensahe sa duha ka mag-agaw nga tinun-an nga naghikog-patay didto sa Daanbantayan nga gi-publikar kagahapon sa mga mantalaan.
Pero in fairness sa magtutudlo nga napasanginlan nga maoy hinungdan sa paghikog tungod sa wa pagpirma sa clearance dili siya maoy angay’ng pasanginlan nga maoy hinungdan sa paghikog tungod kay ang dalagita nga maoy unang naghikog, gikalalis man sa amahan ug nakumotan pa ang baba.
Hinuon sa ikaduhang hikog nga insidente sa laing tinun-an nga lalaki ug ig-agaw sa unang nagpakamatay posibleng mabasol ang Filipino subject teacher tungod sa iyang paglangay-langay pag-pirma sa iyang clearance.
Kinahanglang manubag ang magtutudlo. Apan in fairness dili sab maayo kung tinuod man nga gihulga kini sa mga kabanay.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
