Kon pakli-on mo ang mga pamantalaan ning semanaha, ubay-ubay ang mga taho nga may kalabutan sa kumbati sa kahanginan.
Ang una tingali nga wa mahimuot sa kalihukan sa kahanginan mao ang Iran. Wa mahimuot ang Iran sa tabang sa mga Kano, pinaagi sa air strikes, sa pagkuhag balik sa Iraq sa dakbayan sa Tikrit gikan sa kamot sa IS (Islamic State). Dili opisyal ang pagtabang sa Iran sa Iraq apan tataw sa mga taga didto nga kining maong silinganang nasud maoy nagpasi-ugda sa pagsulong sa pagbawi sa Tikrit. “Nganong ni enter pa man ni sila?” Mao tingali kini pangutana sa mga Iranian officers nga maoy nangulo sa kumbati.
Tungod sa pagsakdap-bomba sa mga abyon sa Kano sa mga headquarters sa IS sa Tikrit, daghang mga sundalong Shiite nga maoy labing baga sa coalition batok sa IS ang mi boycott sa maong opensiba ug mibahad nga kon makakita silag mga Amerikano, ila kining patyon. Naunsa man sad ning mga Kano nga kawatan mag dungog ug kalipay. Kinsa pa may ganahan makig gubat kon inig kahuman ang America ra diay mo-angkon sa inyong kadaugan. Matud pa usa ka leader sa maong coalition, ang mga talawan ra ug huyang maoy nanginahanglan sa tabang sa mga Kano. Kining mga Kano apil-apilon kaayo bisag wa sila masuhito sa padagan sa usa ka lugar. Sila may namugus adtong insidente sa Mamasapano.
Ang ika-duhang kaspa nga gihatag sa kahanginan ngadto sa Iran gikan sa mga abyon-miltar sa Saudi Arabia nga misulod sa Yemen haron mo-bomba sa mga rebelde nga mipalagpot sa presidente sa maong nasud. Matud pa, nag-bagulbol ang
Iran kay sila may ga suportar ning maong mga rebelde sulod sa pinaka purdoy nga nasud sa Middle East. Dinhi ning maong lugar nagsugod sa iyang kampanya si Osama Bin Laden.
Laing taho kabahin sa kagubot sa kahanginan may kalabutan sa bintana. Ang karaang artista nga si Melissa Mendez gikataho nga milingkud daplin sa bintana sa eroplano nga gikan sa Manila pa-ingon sa Pagadian kay tingali buot siyang mokuhag hulagway sa mga panganud pinaagi sa iyang cellphone. Ang problema lang kay duna nay nakatag-iya sa maong lingkuranan. Gipabalhin siya. Apan dihang galupad na ang maong abyon, mibalik ang sapot sa artista ug iyang gibalikas ug gipanumbag ang mga flight attendant ug kadtong tag-iya sa lingkuranan sa may bintana. Tungod niani, mibalik sa Manila ang Cebu-Pacific nga abyon para pakanaugon si Melissa.
Apan ang kagubot sa kahanginan mipadayon sa yuta dihang gikiha si Melissa ni Rey Pamaran, ang tag-iya sa lingkuranan nga iyang gisumbag, sa kasong pagpaka-uwaw, Tres Milyones ang gipangayong danyos sa abogado ni Rey nga si
Raymond Fortun. C’mon Raymond must you make a Fortun out of this. Sad-an si Melissa pero kon buot hunahunaon si Melissa ra man say nauwawan sa iyang gibuhat.
Kon bintana ang hinungdan sa kagubot sa Cebu-Pacific, puertahan sad maoy hinungdan sa nahitabo sa Germanwings nga eroplano nga nahagsa didto sa French Alps. Gikan sa Barcelona ang maong Airbus 320 paingon Duesseldorf. Sa ilang nakuhang impormasyon sa voice recorder ning maong eroplano, migawas ang pilot sa cockpit kay para tingali moadto sa CR apan pag gawas niani gi-trangkahan dayon sa iyang co-pilot ang puertahan sa cockpit. Dihang mibalik na ang pilot nanuktoktok kini apan wa na kini abrehis iyang co pilot nga mipa-dive sa maong abyon nga may 150 ka tao, lakip na ang duha ka piloto.
Sunod, maayo tingaling butangag arinula ang cockpit para dili na mogawas ang pilot kay basig mo likoy unya ang iyang co-pilot inig gawas niya.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
