Mireklamo intawn kanako pinaagi sa pagpadala og suwat ang pamilya niadtong asawa ni FO2 Jufran Galera kinsa gibinastos ni F/SInsp. William Tacaldo pinaagi sa paghikap-hikap sa mga pribadong parte sa lawas sa biktima unya gihalog pa unya gisunod-sunoran pa atul sa house blessing, birthday ug baptismal party sa bay ni FO1 Jofil Avenido niadtong June 5, 2010.
Ang biktima ug ang opisyal gi-imbitar atul sa maong party unya hubog na si S/Insp. Tacaldo kinsa kanhi Dumaguete City Fire Marshal.
Ang biktima mikiha sa binuhatan sa opisyal ug namatud-ang sad-an sa kasong simple misconduct ug duna nay 6 months suspension ug aprubado na ang suspension ni DILG Secretary Mar Roxas.
Ang suwat reklamo nagkanayon: “Maayong adlaw kanimo ug manghinaut ko nga anaa ka sa kapiskay sa panglawas aron padayon ang imong pag-alagad sa publiko pinaagi sa imong programa.
Misulat ako kanimo aron ipahibawo kanimo ang among kaguol ug kalagot sa lantaran nga pagsupak sa usa ka order ug desisyon ni Secretary Mar Roxas nga pagsuspenso sa Provincial Director sa
Negros Oriental Fire Department diin nahimo na kini nga final and executory.
Apan taliwa sa maong order wala kini gi-respeto sa maong opisyal nga si Major William Tacaldo nga maoy nagbinastos sa among paryente.
Daku kaayo among kaulaw sa iyang gibuhat kay nabaniog among pamilya tungod sa iyang pagminanyak.
Ang iyang order sa pagka suspenso magsugod na unta adtong Mayo 1, 2015 apan subo nga huna-hunaon nagpabilin man kini sa iyang pwesto.
Mangutana lang unta ko nimo, Sir Lloyd, pwede diay na nga magpabilin siya bisan ug nasuspenso naman siya? Gisunod niya si General Purisima?
Ang nakadaot Sir murag gitabangan siya sa bag-ong director sa BFP-7 Supt. Erlinda Tobias nga makalingkod gihapon siya sir.
Mamalihog unta mi nimo Sir nga imong mahisgotan ang maong suliran namo. Kay sa pagkatinuod lang sir wala pa gyud namo hingpit na-angkon ang hustiya.
Nalipay na unta mi kay mi-desisyon na si Mar Roxas, wala man hinoon kini gipatuman sa director sa BFP-7.
Unsa man sir nabayran ni siya ni Major Tacaldo? Sir, solid kami nga tigpaminawan nimo dinhi sa Dumaguete City Negro Oriental.
Walay sipyat nga maminaw kami nimo matag adlaw kon duna kay progress.
Manghinaot ko sir nga mapaabot kini sa hingtungdan ug mabulgar ang ilang kabuang sir, Daghang salamat!”
Nganong na-ingon ani man tuod kini Director Tobias? Ingon ani na gyud ka untouchable si Tacaldo?
Butang kini nga angay’ng subayon sa Ombudsman Visayas.
* * *
Sadya gyud ang politika sa probinsya sa Sugbo kung modayon paglansar sila si kanhi gobernador Lito Osmeña, Gwendolyn Garcia, incumbent governor Hilario Davide III ug Vice-governor Agnes Magpale.
Mahug nga upat ka mga dagkong haligi sa pulitika ang magtigi sa pagka-gobernador sa 2016 presidential and local elections.
Akong gi-apil si Magpale sa listahan kay akong mga tinubdan ug mga insider sa Kapitolyo mi-ingon gyud nga tay-ogonon kaayo ang Davide-Magpale tandem.
Ambot kung seryoso ba gyud si Lito kay basig maparehas kini sa una nga nag-ayo lang sa pasi-atab. Unya nako motoo kung mo-file siya og certificate of candidacy ug dili mo-withdraw sa iyang candidacy.
In fairness ni Lito daku siya’g panglantaw alang sa dugang kaayohan sa Sugbo pero taas na og edad unya maglisod na pagkatkat sa bukid aron mangampanya.
* * *
Natandog kaayo ko niadtong special report ni Ador Mayol dinhi sa Cebu Daily News nga pwerte’ng puno-a na gyud intawn sa mga binilanggo ang Mandaue City Jail.
Tungod sa kahuot daghan ang nagkasakit kay wa nay klarong kinatulgan kay mag-shifting-shifting sila sa pagpangatulog.
Way kalainan kini sa ubang mga jail facilities nga pwerte’ng dasuka na gyud sa mga piniriso.
Unsaon pag-angkon og rehabilitation sa mga binilanggo kung ingon ani ka inutil ang atong mga kadagkuan sa Bureau of Jail Management and Penology (BJMP) pagsulbad sa problema?
Mao ni ang klaseng huguka nga liderato sa gobyerno. Pagka daghang kwarta sa gobyerno. Wa gyud sila maka-atiman?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
