Grupo sa sindikato maoy responsable kang PO1 Jorge?
Manawagan ko sa atong mga kadagkoan sa kapolisan sa Police Regional Office-7 (PRO) pinangulohan ni C/Supt. Tom Bañas nga tarungon pag-imbistigar ang pagka-missing ni PO1 Jimmy Saranillo Jorge kinsa lumad nga taga Manlapay, Dalaguete ug naka-eskuwela sa high school didto sa amo sa Casay, Dalaguete.
Dakong insulto sa liderato sa kapolisan kung di sila kasulbad ning maong krimen nga ilang kabaro.
Hangtod karon kadudahan pa nga dili iya kang PO1 Jorge kadtong bukog nga napalgan niadtong Domingo sa silingang baryo sa Manlapay nga habig na sa Badian nga unang gitohoan sa asawa nga si Marilyn nga iyang bana.
Dili garantiya nga mao na gyud na ang patay’ng lawas taliwala nga susama ang gisul-ob nga sapot kay daghan na baya’ng nangasipyat pag-claim og patay.
Bisan pa nga dunay gidug sa kalabera nga mga I.D., radyo, pusas ug ubang mga gamit ni PO1 Jorge apan dili pa kini garantiya nga iya na gyud ang patay’ng lawas hangtud dili maklaro ang tanan.
Kinahanglang subayon ug i-establisar gyud pagtarong ang identity pinaagi sa DNA test ug dental examination kung iya ba gyud ni PO1 Jorge ang kalabera.
Apan kung masuta nga iya gyud, daghang motumaw nga mga pangutana kung nganong namatay o gipatay siya ug nganong didto man siya naabot sa habig sa Badian unya hilit pa gyud kaayo nga lugar.
Wa kaha dudahi si PO1 Jorge sa mga nananom kaniadto og mga marijuana sa bukid sa Badian ug Dalaguete nga siya maoy nagbunggo sa daku’ng sindikato sa marijuana plantation hinungdan nga siya gipatay sa grupo?
Dili kaha silingan ra sa pulis ang utok sa krimen ug dinhi siya sa dakbayan sa Sugbo gi-pick up ug gipatay unya didto lang sa pag-utlan sa Dalaguete ug Badian gilabay sa lawom nga kagabhi-on aron gyud pag-mislead sa mga kadagkoan sa PNP?
Si PO1 Jorge sakop sa Cebu City Tourist Police Unit ug nahimong escort ni Mayor Michael Rama.
Na-missing siya niadtong Disyembre 2013. Misugilon ang asawa nga si Marilyn niadtong higayona nga mo-duty kini apan wa na mouli.
Nabatasan sa taga bukid nga kung mouli ang ilang kababayan nga tagsa ra’ng makauli sama kang PO1 Jorge, magsadya gyud kana ug bisan ang katapusang bungtod mahibawo sa balita.
Ayaw ko’g ingna nga kung nidalikyat pag-uli si PO1 Jorge sa Manlapay, Dalaguete niadtong tungura, wa gyu’y nakakita kaniya.
Kinahanglang palawman ang imbestigasyon sa iyang kamatayon kay nagtuo ko nga dunay nagpaluyo nga pundok sa sindikato nga responsable sa krimen.
Gihulagway si PO1 Jorge sa iyang mga kauban nga tarong, makamao sa trabaho ug sobra ka kugihan. Bisan ang iyang mga magtutudlo sa Casay naanugnan kaayo kaniya kay usa ka buotan ug hilomon nga klaseng pagkatawo.
*****
Di ko makatuo niining allegation sa University of the Philippines (UP) Engineering Student Council nga dunay massive cheating atol sa 2015 Mechanical Engineering Licensure Examinations diin taga University of Cebu (UC) nga si Micah Arceño maoy ni-top.
Di makadawat ang student council sa UP nga Cebuano-based school ang labing ngilngig sa natad sa mechanical engineering?
Nagtuo na gyud ni’ng taga Manila ba nga sila ray makamao.
Kinsa man gud ning mga tinun-an sa UP nga nang-akusar? Nganong wa man sila mopatim-aw? Nganong dili man sila mang-execute og affidavit sa Professional Regulation Commission (PRC) aron dili isyuhan og lisensiya kadtong mga nangudigo?
Di ko ka imagine nga makaako sa pagpangopya ug magkopyahanay ang mga examinees nga dunay nagbantay.
*****
Kataw-anan kaayo ang ubang mga personalidad nga miduso sa ilang certificate of candidacy pagka-presidente sa nasod ug sa ubang posisyon sa umaabot eleksiyon.
Di pa ni mao. Akong tan-aw mahimong circus ang buhatan sa Commission on Elections (COMELEC) ugma ug sa adlaw’ng Biyernes nga maoy deadline sa filing sa COC kay daghan pa’ng matakdan sa kayabag ning uban.
Klaro kaayo nga pasikat, paukyab ug yaga-yaga ra gyud ning ubang mga mikandidato.
Hinuon di ko kabasol ning huna-huna sa uban nga mag-iningon ani kay sagad kanato frustrated kaayo niining pagdumala sa atong mga kadagkoan sa gobyerno bisag kinsang administrasyon.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
