May libreng tambal pero dili 24 oras

By: Lloyd Suarez November 25,2015 - 01:56 AM

Daghang  impormasyon  nga akong  nasagap  human  niadtong  nahitabo sa  Minglanilla  District Hospital   nga  napatyan  og  tuig kapin nga bata  dihang wala  tarunga’g  tabang ni Dr. Agnes Demano.

Unsa  man  ka  tinuod  nga  way mga  personnel  sa  mga district  hospitals  ug sa  mga municipal  health  offices  ang  magbanos-banos  pag-duty  sa supply sa tambal alang sa  24  oras  nga availability?

Dunay mga  libreng tambal  apan  ang na-practice mao  nga ma-avail     lamang kini  sa  panahon  nga  regular  office  hours.

Buot  ipasabot  gikan  lang sa alas 8:00 sa buntag ngadto  na sa alas 5:00 sa  hapon  ang availability kay  ang  mga  personnel  nga gitugyanan  mouli  man human  sa alas singko sa  hapon ug  dalhon ang  yawi sa  balay?

Seryoso  kaayo  kini’ng mga butanga,  Governor Junjun  Davide  ug  Dr. Cynthia  Genosolango,  kay  sama  niadtong  bata  nga  namatay,  wa  gyu’y  mahimo  si  Dr.  Demano sa paghatag og  libreng  tambal  kay  wa man  diay  niya  ang  yawi  sa vault  nga gibutangan  sa mga tambal. Gabii na baya to.

Kung  mao  ning  kalakiha, dili  lang  si  Dr.  Demano  ang  manubag. Mas  maayong imbistigahon sab  si  Dr. Sequerra  nga  maoy chief  sa Minglanilla  District  Hospital.

In  fairness  ni  Dr. Demano nga wa gyud  makatabi  sa  media,  kinahanglang   hatagan  sab seguro  siya og  panahon  sama sa  usa  ka formal  and full-blown investigation.

Unsa may  gamit  sa  provincial  ordinance  ni  Vice Gov.  Agnes Magpale   nga  librehon sa  mga tambal  ang mga  bata  nga  6 anyos  paubos  kung dili aberto  24 oras  ang supply sa  mga  tambal?

Nabutang  ba sa  ordinansa nga kinahanglang  24 hours open ang supply  unya dunay  proper turn-over  sa  yawi sa butanganan  ug  dunay  mga point  person nga  in-charge?

Wa  kaha  gamita sa  pamolitika ang mga tambal?

Subaya  intawon ni  ninyo, Mr. Governor! Ayaw  tawon mo pagmata’g morning.

* * *
Maayo  kay  aksiyonan  kuno  ni Cebu Provincial Police  Director Senior  Superintendent  Noel  Gillamac ug  iyang disiplinahon  kadtong  iyang  pulis  nga  na-sentro sa  publication sa akong  lindog  dinhi sa CDN niadtong Lunes  tungod  sa  pagka-abusado nga  maoy hinungdan nga   hapit  nagsungag ang  among  mga sakyanan diha duol  sa  Lahug Public  Market niadtong Miyerkules sa gabii.

Gitahasan  ni  S/Supt.  Gillamac  si  Supt.  Brindo  Nacario,   hepe  sa  Provincial Investigation  and  Detective Management  Branch,  pagsusi  ug  pag-ila kung  kinsa  kadtong  maong  pulis.

Si Supt. Nacario ni-text  ug  nanawag  kanako  kagahapon  ug  nagpakisayod  sa  identity  sa  maong  police  officer nga  may  kuyog babaye nga  naka- civilian attire niadtong  tungura.

Wa ko’y  pangan sa  pulis  kay  wa  magsul-ob  og  name plate niadtong  higayona  nga  gikonprontasi  sa akong  kapikas. Apan  makaila pa  mi sa dagway.

Lisod  gyud  og  maoy  magdaghan  sa PNP!

* * *

Akong gidayeg ang paningkamot  nila ni  S/Supt.  Noel  Gillamac nga  kahatagan  gyud  og  hustisya  ang  kamatayon ni  PO1  Jimmy Jorge kinsa  lumad  nga taga Manlapay,  Dalaguete nga gipusil-patay   ug  gilabay  iyang kalabera didto  sa  utlanan sa Dalaguete ug  Badian unya   niadtong miaging  buwan  pa nakit-an.

Pero ambot  kung  di ba lubog  ang  hustisya    sa  kamatayon ni PO1 Jorge  ngan  nga   way  direktang  testigo  nga  nakakita gyud sa  akto   sa  pagpusil- patay  sa  pulis.

Sa  kasamtangan,  dunay  lima  ka  mga  tawo ang  gipasakaan  na’g  kaso  apan  pulos  pa  teyoriya  ug  pangagpas  nga  sila  maoy  mga  responsable.

In fairness  hinuon, konbinsido  na ang  pamilya  ni PO1 Jorge nga ang  lima  gyud  maoy mga  responsable tungod  kay  mao ray dunay  kalagot  human  nabawi sa  pulis  ilang  yuta  gikan   kang  Andres Llego, usa sa  mga  suspects.

Kauban  ni Llego  mao sila si Tanny  Carticiano, ingon man ang  mga sakop sa  pamilya  ni Tanny nga sila si   Luciano, Jade ug Jennilyn.

Gawas  sa  katigayonan,  may  kalagot  usab sila  kang  PO1 Jorge  human naronda ang  ilang  marijuana  plantation.

Diha gyud  hinuon  sa  mga  bukirang bahin sa Dalaguete,  ang  hinungdan  sa  patay  mao  ang  panag-inilogay  sa  yuta  ilabina  kung  kabilin sa  mga  ginikanan.

Pun-an  pa  kaha nga  ang  napatay nga  pulis  daan na’ng  nanabi  nga  ilang tarukan  og  balay  ug puy-an  ang yuta mao nga   misamot  ang  kahadlok  sa  mga  responsable  kay  mabisto  na ang  ilang  illegal  drug  operation.

Manghinaot  ko  nga  dunay  mo-surface  nga  eye-witness  ning  maong  krimen  aron  matagbaw gyud ang  pamilya  ning  maong  pulis.

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Cebu, Minglanilla District Hospital, public hospital

We use cookies to ensure you get the best experience on our website. By continuing, you are agreeing to our use of cookies. To find out more, please click this link.