Dili malalis nga usa gyud ka dakong palpak ang pag-inject sa expired nga insulin ngadto sa public school teacher nga si Hezil Relabo Aparecio didto sa Tuburan District Hospital.
Mamatay ba dayon ang diabetic patient sama sa maestra human nasudlan iyang lawas sa expired nga insulin? Ang tubag sa mga eksperto, dili makapatay.
Apan kung dili pa kadto expired, segurado nga mominus ang sugar level sa pasyente ug dunay posibilidad nga mabuhi gyud to siya. Pero kung pagbuot sa Ginoo nga kuhaon ang gihuwaman nga kinabuhi sa tawo, wa gyud tay mahims.
Mao seguro nga nakahukom ang kabanay nga di nalang mokiha sa kamatayon sa maestra kay gawas nga nag-merida na to siya’ng daan, ilang na-assess nga kabubut-on sa Diyos ang tanan.
Apan kinsa man gyud ang manubag pag-inject sa expired nga insulin ngadto sa namatay? Si Dr. Augusto Riconalla ang on-duty nga doctor? O ba kaha ang nurse nga maoy nag-inject? O ba kaha si Dr. Jataporn Vatanagul nga maoy tag-iya sa botika nga gipalitan sa expired nga insulin? O ba kaha ang trabahante (dili pharmacist) sa botika nga maoy nagtunol sa expired nga insulin?
Sa practice sa mga pampublikong ospital sama sa Cebu City Medical Center ug sa Vicente Sotto Memorial Medical Center ingon man sa mga pribadong ospital, ang trabaho sa doctor mao ang pagresita sa tambal ngadto sa mga pasyente.
Samtang ang trabaho sa nurse mao ang pagtabang sa doctor ilabina gyud ang pagpa-inom sa mga tambal ug pagtusok sa tambal ngadto sa pasyente.
Ang akong punto ba, pulos nagdanghag si Dr. Riconalla ug ang nurse sa ilang trabaho kay wa nila i-double check ang expiry date. Tiaw mo na niadto pa’ng Enero ang expiry date.
Kung mo-insister gyud si Dr. Riconalla nga inosente siya, nganong mosugot man siya nga mo-resign nalang sa puwesto?
Partly, manubag baya si Dr. Vatanagul, ngan nga siya maoy tag-iya sa botika, kay pakyas siya pag-inbentaryo sa iyang mga baligya nga tambal nga expired.
Way plano si Tuburan Mayor Aljun Diamante pagpasira sa botika nga “Dok Tang’s Pharmacy” nga ang proprietor mao si Iris May Vatanagul?
Nganong mitugot man sab ni ang taga Department of Health (DOH) ug Food and Drugs Administration (FDA) nga maka-operate ang botika nga ang magbantay dili mga pharmacists?
Nganong palpak man sab ni’ng taga DOH ug FDA pagsakmit niining mga tambal nga gibaligya sa mga sari-sari store ug ubang tindahan nga dili otorisado?
Alarming na kining mga panghitabo sa atong mga district hospital. Panahon na nga ang tanang mga sakop sa Cebu provincial board mopahigayon og full-blown investigation in aid of legislation.
* * *
Ako lang klarohon nga dili intawon ako ang nag-una-una pagbutyag sa kahanginan sa among sibyaanan sa DYSS Super Radyo kabahin sa isyu sa sabak-sabak ni Provincial General Services Office (PGSO) head Jone Siegfred Sepe.
Uwahi na kaayo ko nga nakabalita niining maong isyu. Kini kay may aso, duna gyu’y kayo.
Kung napahawa kaniadto si Capitol consultant Loi Madrigal niining nilalaki ug personal nga isyu, way rason nga di kini mahimo ni Governor Davide ngadtong Sepe.
Dili mapalagpot ni Governor Davide si Sepe kay sama kini kang Atty. Orvi Ortega, provincial legal officer, nga nalambigit sab kaniadto unya ang common denominator, kining duha ka mga opisyal sa Kapitolyo suod kaayo sa dughan ni Gov. Junjun?
Si Madrigal nga tawo sa mga Martinez, tulin pas alas kuwatro napahawa.
Ang ako lang unta ni Governor Junjun nga kinahanglang consistent siya pagpatuman sa tinarong ug lidgong nga pagpangalagad kay nagtuman man kaha ta sa “Tuwid na Daan”?
* * *
Way rason nga dili mag-una sa survey sa 2016 presidential race si Davao City Mayor Rodrigo “Digong” Duterte kay napul-an na ang mga tawo sa mga milabay’ng pamunoan ug niining kasamtangang administrasyon.
Paborito si Duterte kay anaa niya ang tanan. Lig-on og baruganan unya bisag abogado, wa nay “rule of law” batok sa mga sagbot sa katilingban.
Gawas niini, frustrated ang mga botante sa liderato ni P-Noy gumikan sa kadaghang bulilyaso.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
