Super Hirit
Usa ka dakong kadaugan namong mga sakop sa prensa sa Sugbo sa bag-o lang natapos nga 22nd Cebu Press Freedom Week ang pag-dismissed sa Department of Justice sa kasong libel nga gipasaka ni Cebu City Mayor Tomas Osmeña batok kang Sir Super Bobby Nalzaro.
Matuis lang seguro ang findings ni DOJ Secretary Vitaliano Aguirre II kana kung maka-offer og bag-ong ebedensiya ang kampo ni Mayor Osmeña.
Sa unom ka pahina nga resolusyon ni Justice Secretary Aguirre nagmando sa Lapu-Lapu City Prosecutor’s Office nga ipa-withdraw ang kasong libel batok kang Sir Bob nga naka-pending diha sa sala ni RTC Executive Judge Gilbert Moises.
With all due respect kang Judge Moises, tipik ug kabahin sa iyang ministerial duty mao ang pagsanong sa findings sa DOJ kay ang resulta sa petition for review kabahin baya sa substantive due process.
Hinuon may katungod pa ang kampo ni Osmeña pagduso og motion for reconsideration didto sa DOJ apan tungasonon na kaayo kini.
* * *
Atol sa among programa’ng “Dialogue On The Air” sa DYSS Super Radyo niadtong Sabado, akong nasabtan kang Cebu City Mayor Tommy Osmeña nga duna siya’y tulo (3) ka mga rason pagpasira sa Cebu Zoo diha sa Barangay Kalunasan.
Ang mga hinungdan mao ang mismanagement, graft and corruption ug ang land-swapping deal tali sa syudad ug sa province of Cebu.
Sa isyu sa mismanagement, akong nahibaw-an nga dili kuno capable sila si Giovani Romarate ug ubang mga sinuhulan nga mga empleyado sa syudad pag-atiman sa mga wild animals hinungdan nga nangamatay ang uban.
Pero in fairness ni Romarate, dunay credential ug capable kini nga maka-atiman sa mga hayupan.
Ang nakaporke lang kay biktima sa political cross fire ang mga hayupan kay numero uno, dunay mga empleyado sa zoo nga nangampanya kaniadto sa kandidatura ni kanhi mayor Rama hinungdan nga wa maka-focus pag-amuma sa mga hayop hinungdan nga nangamatay.
Karon gisamutan kay wa na hatagi sa iyang renewal si Romarate kinsa pro-Rama diin si Romarate naka-establisar na unta og maayong relasyon sa mga hayop.
Sa isyu sa corruption mao ang kabahin sa pagkaon sa mga hayupan nga giingong gi-overpriced ug kadtong snake’s massage nga gibulsa lang ang kita sa mga nagdumala ug ang ubang donations alang sa zoo.
Dunay akong nahibaw-an nga namalit ang syudad og mga hayupan nga nagkantidad sa 200 mil pesos apan giingong way klaro kung asa ang mga hayop.
Si Romarate gimanduan na sa taga DENR pag-uli sa tulo (3) ka mga dagkong sawa nga iyang gidala ug maoy gigamit kaniadto sa snake’s massage kay wa siya’y permit.
Kabahin sa snake’s massage, ang pundok sa Island Rescue Organization (IRO) nagtinguha sa pagkiha kang Romarate sa kalapasan sa Animal Welfare Act ug andam usab ang Department of Agriculture pag-imbistigar kang Romarate.
Apan ang nakadaot kay nganong karon na man lang sila maningog sa violation sa snake’s massage?
Dili isyu ang land swapping kay puwede kaayong magkasabot ang syudad ug ang kapitolyo sa 7 hectares nga property diha sa Kalunasan diin nahimutang ang zoo.
Naningkamot ko nga makatubag ning maong mga isyu si Giovani apan sumala pa ni City Councilor Dave Tumulak, atoa kini karon sa Davao kay na-ospital ang amahan.
Way plano ang mga animal rights advocates apil na ang atong mga ahensiya sa gobyerno pagkiha sa mga iresponsableng mga politiko nga maoy hinungdan nga naapiki karon ang atong mga hayupan?