Salins Hulbot
Nyor Gamay (NG): Nyor, di ba diha naman ning pintayanay nga binlan dayog placard sauna?
Nyor Dako (ND): O. Murag panahon pang Cory diha na na.
NG: Unsa may hinungdan ani, Nyor?
ND: Paglingla.
NG: Pasabta kunoko, Nyor.
ND: Ingnon ta lang naa koy personal nga away nimo. Nagribal ba ta ron sa chix. O di ba kaha hinuon imong gidagan akong bahin. Ipapatay tika. Pero para ma dismular, pabutangan nakog placard nga “pusher” ang imong lawas. Tungod ning maong placard nahimong “social” issue ang imong kamatayon ug segunda na lang ang personal motive nako. Labi na kon nadungog mogamit kag shabu, makalimtan na lang ang imong atraso nako ug ang atimanon na lang sa imbistigasyon mao ang drug angle.
NG: Pero dili tingali tanan karatola killings, Nyor, mga personal motive nga gitabunan lang og drug motive.
ND: Ingnon ta lang tinuod nang imong gisulti. Pero kinsa ug unsa may tumong ning maong mga killers?
NG: Bitaw sad Nyor, no? Kinsa man ni sila?
ND: Malagmit mga sakop kini sa karibal nga sindikato sa druga. Ug mahimo usab nga kining gipamatay mga posibling mopiyaet sa ilang mga protector nga anaa karon sa kagamhanan.
NG: Kining ikaduha nimo nga example, Nyor, matawag nig extra-judicial killing?
ND: Ang nakaparat aning extra juice n’ pandesal kay hapit tanang patay nga gidudahan nilang pulis ang gapaluyo bunyagan dayon nila niani.
NG: Unsa man diay extra juice para nimo, Nyor?
ND: Niay sample, Nyor. Diri niadto sa amo sa Mambaling dihay gigukod ang mga pulis nga tulisan. Usa kanila mikatkat sa atop nga duguan na. Misinggit kini nga mo-surrender na siya. Iyang gilabay ang iyang pistola. Apan wa mokumpyansa ang pulis kay basig duna kini laing armas. Mao nga ila kining gipusil gikan sa ilawom sa atop hagtud nga nawad-an kinig kinabuhi. Nakadungog na man usab tingali ka nga kadtong mga piniriso nga nagsigi nalag sulod-gawas sa prisohan, padaganon na lang sa mga pulis unya pusilon. Kining maong mga hitabo ang matawag natog “extra-judicial killing.”
Apan kining mga gipamatay sa mga riding in tandem unya gipangtabunan og karatola nga may gisuwat nga “adik” pusher”, dili ni extra juice intawon.
NG: Unsa man diay tawag ani, Nyor?
ND: Karatola Killings.
NG: Ha? Duol ras karton girls.