Hatagan nako og perfect score nga grado si Presidente Rodrigo Duterte sa iyang unang 100 days nga pangatungdanan sa nasod kay duna gyud siyay baruganan ilabina sa seryosong kampanya batok sa illegal drugs.
Ang mga naglagot ra ni Duterte maoy mihatag og score nga zero ilabina kadtong mga kabanay sa gipangpatay nga nalambigit sa illegal drugs.
Kung si Mar Roxas pay midaog, matilawan kaha nato ron ang palibot nga nalimpiyohan na sa mga badlungon sa katilingban?
Mao nga patay pa more! Rule of law? Kining gipangpatay mituman sa balaod?
* * *
Pabor ko nga himuong legal ang operation sa habal-habal ug tugotan nga mag-overloading ang mga motorsiklo.
Akong nakita nga kini maoy sulbad sa atong problema sa traffic kay ang motor gamay rag makaon nga space sa kalsada ikomparar sa mga SUV nga sagad sa nahitabo, driver o tag-iya ray sakay.
Paita gyud sa problema sa traffic karong panahona. Puwera-gaba miabot akong biyahe og usa ka oras ug tunga niadtong Biyernes sa gabii gikan sa Basilica Santo Niño paingon sa GMA complex.
Sila si Joel Maloloy-on, chief sa operation division sa LTO, ug Atty. Raffy Yap sa Cebu City Traffic Office pulos mihangop sa proposal pag-legalize sa habal-habal kay dako na gyud kaayog ikatabang.
Karon misamot kadaghan ang mga sakyanang pribado kay barato kaayo ang down payment unya gihimong for hire nga kakompetensiya sa mga taxi.
Di ko moingon nga i-ban nato ang mga sakyanan nga upat ang ligid kay daghan sab ang masakripisyo. Apan puwede nga ipatuman ang number coding o color coding.
Kanus-a man gyud ma-materialize ang BRT ug LRT dinhi sa ato? Masulbad gyud kaha ang atong problema sa traffic kung may BRT ug LRT?
* * *
Giusikan kaayo ko sa krudo sa gobyerno, sa pisa sa patrol car ug sa panahon niadtong mga pulis sa Santander nga nagbalikbalik dinhi sa dakbayan sa Sugbo diha sa opisina sa Provincial Prosecutor’s Office niadtong Huwebes sa hapon ug pagkabuntag sa adlaw’ng Biyernes alang sa inquest proceedings sa ilang dinakpan sa kasong pag-operate og illegal suwertres.
Naluoy sab ko sa ilang dinakpan nga babaye nga si Lucille Portalo Largo tungod kay usa intawon ka inahan nga naluya sa taas kaayong biyahe nga balik-balik.
Sa laktod nga pagka-estorya napakyas ang mga pulis pagpa-inquest sa ilang dinakpan niadtong Huwebes sa hapon kay sirado na ang piskaliya unya naabot sila mga alas 5:20 p.m. na sa akong relo.
Nasaypan pa gani intawon ko sa mga pulis nga usa ko sa mga piskal kay miaksiyon sila paghangyo kanako nga ipadawat ilang kaso kay matud pa na-trapik sila sa Carcar ug San Fernando pun-an pa sa ulan.
Nainutil gyud ang mga pulis. Balik sila sa Santander ug sumala pa naabot sila didto mga alas 11:00 na sa gabii unya pagka-alas 3:00 sa kadlawon nga adlaw na’ng Biyernes mibalik dinhi sa Siudad aron maduso ang kaso batok sa dinakpan ug ipa-inquest.
Akong nahibaw-an sa patakaran ni Provincial Prosecutor Pepita Jane Petralba nga bisag magabin-an sila sa opisina ila gyu’ng paabuton ang mga pulis nga nagdalag dinakpan basta gipahibawo sila daan pinaagi sa pagtawag sa ilang telepono.
Sa kaso sa Santander wa gyu’y abiso daan.
Ang akong nalibgan, ambot nganong mouli ug mobalik pa gyud ang mga arresting officers dala sa ilang dinakpan nga unta duna man silay quarter diha sa Cebu Provincial Police Office nga anaa sa Sudlon, Lahug?
Sa nausik nga oras, dako pa unta silag mahimo sa seryosong kampanya batok sa illegal drugs.