Samtang nakabangon na ang mga simbahan ug mga pribadong building nga nangaguba niadtong Oct. 15, 2013 major earthquake, inutil gihapon ang atong mga kadagkoan sa Korte Suprema nga gipangulohan ni Chief Justice Maria Lourdes Sereno kay wa gyud makapa-ayo sa karaang building sa Palace of Justice nga nag-three years na niadtong Sabado.
Dako unta kaayog bintaha sa gobyerno nga makadaginot sa gasto kung napaayo pa ang building kay sa karon nga nag-antos sila’g abang sa Qimonda IT Center nga nagkantidad og dul-an 2 milyones matag buwan.
Ambot kung hangtod karon gipadaplin ba nila ang paghatag og priority sa pag-ayo ngan nga nagkinahanglan kita og daghang additional courts sa tibuok Pilipinas pagtubag sa nagtipon-og nga mga kaso tungod sa grabeng kalangay.
Magamit gyud unta kining maong building pag-accommodate sa mga bag-ong korte nga tukoron.
Ang ilang kalangayan maoy tinuod nga salamin nga na-inutil ang pag-angkon og hustisya sa mga kabus.
* * *
Usa nako sa nakatawa sa depensa sa process server ni Cebu City Prosecutor Liceria Lofranco Rabillas nga si Carlo Labra Algarme sa iyang kasong pagpanglungkab sa laboratory building sa Kapitolyo nga nakadala og CPU.
Si Carlo nga wa ikiha sa taga Kapitolyo mi-report na niadtong miaging semana ug nakahigayon ko sa pag-interview kaniya.
Wa siya moangkon sa paglungkab ug pagpangawat sa CPU. Sumala pa niya nga samtang nanguha siya og mga kaka sa property sa mga Villalon nga bungtod ug ibabaw sa Capitol premises, nahu’og siya kay nahunlak ang riprap sa mga Villalon.
Hinungdan nga didto siya natugpa sa bakante’ng lote sa Capitol premises og gialarma siya sa mga guwardiya.
Nag-inabogado na si Carlo kay matod niya wa sa iyang constructive possession ang CPU.
Ang iyang mga kauban sa opisina wa gyud motuo kay sa una niyang pamahayag miangkon kini nga gikuha niya ang CPU kay anaa sa sulod ang mga kaka.
Laing punto nga dili siya katohoan kay kung tinuod pa nga nahu’og siya sa riprap, puwerte’ng pataya niya kay lawom kaayo. Hehehe. Pastilan nimo, Dong Carlo!
Si City Prosecutor Rabillas miingon nga duna silay mga lakang nga gihimo.
Akong nahibaw-an nga advice to leave for 1 month si Carlo tungod sa nahitabo.
Gipatawag na sab ni siya ni Judge Soliver Peras kay napasanginlan sa mga guwardiya nga maoy nanglungkab sa mga sala kaniadto.