Nyor Gamay (NG): Unsa man na ang supermoon, Nyor.
Nyor Daku (ND): Kon si Superman super nga tao, ang supermoon nga buwan.
NG: Ay gud pag sigig inamaw Nyor.
ND: Unsa guy inamaw? Di ba kon takdol modagku mang bawod?
NG: O.
ND: Kon Super moon mas modagku ug mas mokiat ang bawud. Tungod kay mas daku ug mas kusgan man kini kon itandi sa normal nga takdol.
NG: Pero nganong ni daku ug nahimong mas kusgan ang buwan ning maong pagtakdol.
ND: Ingon ani ni Nyor, Gatuyok tas adlaw samtang ang buwan gatuyok nato.
NG: Nakahibawo na intawon ko kabahin anang solar system Nyor. Ang ako lang gustong mahibaw-an kon nganong modako man siya nianang maong pitsa diin siya mitakdol.
ND: Nakalimot kong gusto man diay kag shortcut. Pero paminawa lang sa ko. Ang atong pagtuyok sa adlaw ug ingon man ang pagtuyok sa buwan sa atong kalibutan dili perfect circle. Dunay mga higayon nga mas doul kita sa adlaw ug sa samang bahin duna say higayon nga mas duol ang buwan kanato. Kon mahitabo nga duol kanato ang buwan sa iyang pagtakdol natural nga mas dako siyang tan-awon ug ingon man ang iyang gravity ug magnet mas kusog kay lagi mas duol man siya. Ug tungod niani mas maka apikto siya sa balud.
MG: May ipikto kaha kini sa atong pangisip?
ND: Daghan ang gatuo duna kini ipikto kanato. Gani duna may gitawag sa Ininglis og lunatics. Mga binuhat nga mayanag ang pangisip kon panahun sa ting takdol o di ba hinuon sa pag subang sa buwan.
NG: Unsa man sad nang subang Nyor?
ND: Kana bang bag-ong pagbutho sa buwan nga daw sungay o korona ang iyang porma. Gitawag nis Ininglis og waxing moon.
NG: May kalabutan kaha sa supermoon ang tago ug dalidaling paglubong ni Marcos, Nyor?
ND: Tingali pero ambot lang.
NG: Miingon raba si Kiko Pangilinan nga mahimong dunay mo petition sa umaabot nga mga panahon ug nga mahimong kawton ang lubong ug haw-ason ang lawas ni Marcos para ipagawas nis lubnganan sa mga bayani.
ND: Ang kataw-anan unya niana Nyor kon tinuod tong gisulti ni Edcel Lagman.
NG: Unsa diay giingon ni Lagman, Nyor?
ND: Matud pa niya naka-hunahuna na ang mga pamilya Marcos nga mahitabo kanang gipangyawyaw nila ni Pangilinan. Ug Tungod niana wa sila mokumpyansa. Ilang gipabilin sa Ilocos ang tinuoray nga lawas ni Macoy ug wax figure o dummy o istatuwa lang ang ilang gilubong sa maong menteryo.
NG: Na! Super ilad ang dangatan sa mokuykoy sa lubong ni Marcos.
ND: Molang. Ug kay wax figure man sulod sa lungon, sa paminaw ko atol sa ting subang o waxing moon ang mahimong ungkat sa maong lubnganan.