Wa ko kasabot ni Assistant City Prosecutor Ma. Theresa Casiño kinsa maoy gi-designate nga spokesperson sa Cebu City Prosecutor’s Office kay gilisod-lisod gyud ko nga maka-access sa mga dokumento sa mga kaso nga may public interest.
Nga unta si Presidente Duterte mipatuman baya og hingpit nga transparency sa iyang pang-gobyerno sa executive branch pinaagi sa pag-implimentar sa Freedom of Information (FOI) diin ang piskaliya o Department of Justice ubos sa Malacañang.
Niadtong miaging semana, misuway ko pag-follow up ug maka-picture o makapa-photocopy sa kaso niadtong tulo (3) ka mga babaye nga nalambigit sa ATM skimming scam ug ang kaso nga gi-file ni Mayor Tommy Osmeña batok sa SM Prime Holdings.
Nakapa-picture man tuod ko sa cover complaint sa kiha sa tulo ka mga babaye, apan sa sinugdanan wa gyud siya mosugot nga makalili ko.
Diha na siya misugot human nakasabot nga importante diay nga masibya ang pangan sa tulo ka mga babaye aron makaagni sa ubang mga biktima pagduso og dugang kiha.
Pero sa kaso ni Mayor Osmeña batok sa SM nagmakuli gyud siya nga maka-access ko kay idestino pa og piskal.
Unsa man diay ka sensitive to’ng maong kaso ni Osmeña batok sa SM?
Unsa may gikahadlukan ni Piskal Casiño ngadtong Osmeña? Kaikog? Kay may utang siya’ng kabubut-on sa mayor dihang nabiktima siya sa pagpamusil niadtong langyaw nga nagwala sulod sa Palace of Justice pipila na ka tuig ang nakalabay?
Unsa may clear-cut policy sa liderato ni Justice Secretary Vitaliano Aquirre sa mga kaso nga may public interest? Way apil sa FOI ug magpabiling confidential?
* * *
Puwerte’ng paeta gyud sa sunod-sunod nga patay didto sa amo sa Dalaguete diin duha ka buwag nga hitabo sa managlahing asawa ang giunay pagpatay sa ilang mga adik nga bana.
Drugas maoy hinungdan niining duha ka mga hitabo. Paeta gyud.
Niadtong Biyernes sa kadlawon maoy labing grabe kay nakaako pagluglog si Jose Benjie Beldad Sr. sa iyang asawa nga si Wilma ug midunggab sa iyang maguwang nga si Amalia Beldad Sabarita ug mi-hostage sa ilang anak didto sa Sitio Cambarko, Barangay Lanao, lugar nila ni Justice Isaias Dicdican.
Kung wa mapatay sa mga pulis si Benjie, delikado pa’ng makabuno og tinugyanan sa balaod.
Tabanganan gyud kaayo ang pamilyang Beldad sa nahitabo kay gawas nga tulo ka mga kinabuhi ang nawala, dunay 15 ka mga anak ang nailo.
* * *
Usa sa among gihisgutan niadtong Sabado atol sa among programa’ng “Dialogue On The Air” sa DYSS Super Radyo mao ang problema sa mga manglimos ug sa mga manaygon sa kadalanan niining nagkaduol na nga pasko.
Duna tay balaod nga nagdili nga mao ang Anti-Mendicancy Law apan lisud gyud ipatuman sa atong taga gobyerno kay makonsensiya gyud pagdakop sa mga tawo nga nagpakaulaw.
Ang pagpanglimos usa ka binuhatan sa tawo nga nagpakaulaw ug gipaubos pag-ayo ang iyang dignidad.
Bisan lagi ako ug bisan dili pasko, basta may ikahatag sa tawo nga nagkinahanglan, mopatigbabaw gyud ang akong kaluoy.
Kung gusto gyud lagi ang gobyerno nga mahipos kining mga klaseha sa mga tawo nga anaa sa kadalanan nanginabuhi, nganong dili na man lang gyud magtukod og dakong building aron adto sila ipahimutang ug buhi-on temporaryo ug tudloan sa pagpakabuhi nga desente?