Mga pipila na ka tuig nga milabay, mi-walk out ang Cebu media sa presscon sa pelikula ni Maricel Soriano ug Aga Mulach kay ang mga panuway nagpamasahe una unya nakatulog samtang gahuwat ang media kanila og pipila ka oras. Dihang milapas nas duha ka oras, naghinayhinay na’g panguli ang buot unta mo-interview kanila.
Gatuo ko nga mao na kadto ang pinakabati nga press con nga akoang tambungan.
Apan niadtong Martes, natambungan ko ang pinakahanggaw nga presscon sukad mi-intra ko ning maong bisyo. Ang presscon sa Miss Universe didto sa J Park.
Kinsa may di mabulabog nga mas taas pa man ang panahon nga gasud-ong mi sa nawong nilang Chavit Singson, Paz Radaza, Justin Uy ug Kat de Castro kay sa mga kandidata mismo. Nayawirdz nas kirat. Kinsa man intawon ang malipay magsud-ong aning mga nawonga. Tungod sa kakuwang sa akong pagpakisusi, nasud kos bulsa ning mga politikong way ayo. Maurag nangandam nis Castro ug Chavit sa Senado.
Nindot man gud paminawon ang ngalang Miss Universe. (Sagdi na lag walay kandita gikas Neptune ug Mars.) Isip maniniyot, ganahan ako mukuhag hulagway sa mga taga lagyong dapit sama sa Norway, Denmark, Iceland ug Russia. Mao nga alang kanako, tungod sa akong kakulang sa research, daw nailad ko kay puros ra man taga Asia-Pacific ang mga kandidata nga mibutho sa maong presscon.
Aniay mga lista sa “wala” ning maong presscon kon itandi sa ubang foreign beauty pageant presscon: 1. Walay blond; 2. Walay Latina; 3. Walay paso; 4. Walay sakop sa organization o sa hotel nga misugat sa media; 5. Walay tuman sa schedule; 6. Walay programa nga giandam; 7. Walay pictorial sa gawas nga unta didto man sa resort ang presscon (pagkalayong espidno aning J Park unya gipasandig lang sa ilang tarp ang mga kandidata. Maayo pag sa Taboan ni gihimo kay naa pay character ang lugar); 8) Wala ni-offer og panihapon ang mga kanahan nga alas syete na man unta nahuman ang maong kalbaryo sa paghuwat; 9) Walay gipagamit nga sakyanan para pauli sa mga nanambong sa ilang mga hinanggaw.
Sala gyud ning tanan si anhing Steve Jobs. Kay sa wala pa mopasikat ning tag-iya sa Apple, dili man unta mosalida ning mga CEO, organizers ug sponsors. Sa una backstage ra man unta ni sila, unya karon sila namay mangharbat sa attention.
Kon madayon man gani kanang inyong January 17 nga swimsuit churva nga tag 12,500 ang ticket, palihug hiposa intawon na ang dagway nilang Chavit, Radaza, Justin Uy ug de Castro kay mabolabog ang inyong salidang pwerting mahala.