Gerard Pareja
Sa matag higayon nga ihatag kaniya, kanunay nga pikhan ni Donald Trump, nga mao karoy pangulo sa US, ang mga media didto nga kanunay usab nga manaway kaniya.
Relentless, kon sa Ininglis pa kining iyang krusada. Fake news media ang tawag niya kanila.
Ang problema ni Trump mao nga maglisud siyag pasabot sa iyang gihunahuna ug gibati ug pun-an pa kini nga dali siyang malain kon dunay manaway kaniya (thin/onion skinned sa English parlance). Matud pa niya usa siya ka counter puncher. Basta ma igo nimo siya mobawos gayud siya sa bisan unsang pamaagi. Ang iyang paboritong pamaagi mao ang pag gamit sa Twitter.
Apan kon sayop siya sa iyang gipanulti kabahin sa media, nganong daghan pa man gihapon kayo ang nagpaluyo kaniya. Tungod kini kay ang mga dumadapig kaniya kulang usab sa pamaagi sa pagsulti ug maong dili na kinahanglan nga isulti pa ni Trump sa saktong pagsulti ang iyang buot ipasabot, masabtan ra siya nila.
Dugang pa nga kining mga establishment media murag pabor ni Hilary Clinton naidtong ilang piniliay, daan na nga way salig ang iyang mga sumusunod ning maong institution.
Mao nga matag panaway nila ni Trump dawaton kinis iyang mga followers nga pandaut sa ilang manok.
Sama pananglit sa taho nga mas gamay ra ang nanambong sa iyang inauguration kon itandi sa kang Obama. Tinuod man kadto. Apan ang pagbutang niani sa headline uban dagkong mga hulagway misugyot og pangaway. Daw miingon kini nga –Hoy Trump, di ra ikaw maoy popular choice. Pagtarong ha. Tan-awa gamay ray nanambong sa imong pagpanumpa.
Maong mitubag ang counter puncher og –biased media with an agenda. Ang media way salig ni Trump ug ang mga Trump followers way salig sa media. Tabla. Di na pasudlon sa press briefing sa white house ang CNN, New York Times, Los Angeles Times ug ang Politico.
Maayo kini sa Duterte administration kay samtang nagkaguliyang ang America, di silag magpunay og panghilabot sa pang goyerno ni Digong. Mas dagko unta ang international headlines sa pagdakop ni Senador De Lima kon ang mga apilapilon wa pay kagubot sa ila.
Ang kauban ni De Lima sa Senado nga si Kiko Pangilinan buot nga modisiplina sa facebook kay kanunay kuno kining gigamet sa mga Duterte follower aron pagsabawag og fake news. Kaayo niya no. Mag-agad na lang ang mga tao sa bias nga balita sa mga network sa Manila. Mag edsa-edsa napud mo dinha unya ingnon mi nga supporter ninyo.
Pasagdi na lang ning facebook kay mao ra ni gamiton sa mga way network ug publication para sa ilang tumong. Fake news? Unsa, bugo na gyud kayo ang mga tao nga di makasabot sa mga hinangaw nga balita. Gusto mo nga kamo ray mangilad.