Gerard Pareja
Ang akong higala nga karaang maniniyot maglingolingo matag kita niya og pasundayag sa action camera nga GoPro sa TV sa mga camera stores.
“Tinuod ba na? Duna bay ingon ana ka gamay nga camera nga makakuhag cinematic kaayo nga resulta?” mireklamo siya.
Giingnan ko siya nga mas sayon sa gamay nga camera ang pagdakop sa aksyon sama sa tambling, sa paglanding sa bisiklita nga ang punto de bista gikan sa pasahero sa bisiklita mismo kay sa dagkong camera. Mas sayon usab protiktahan ang gamay nga camera sa tubig kon ang tumong mao man ang pagpakita sa nakit-an sa usa ka tao nga miambak didto sa sapa o dagat. Maglisod ka man og ambak kon molukso ka nga magpas-an og camera.
Apan galingolingo gihapon ang akong amigo nga gatan-aw sa action scenes nga gipagawas sa TV nga kuha sa GoPro. “Apan di sad tingali ingon ana ka nindot, Bay.” Mipadayon siya pagprotesta. Giingnan ko siya nga kon duna man gani tikas nga nahimo sa maong shoot, kana mao ang wa nila pagbutyag sa lighting sa production. Basig minilyon ang gasto sa lighting sa pagshoot sa maong mga eksina. Labi na kay dili maayo sa lowlight kining GoPro. Ug malagmit duna usay gitampo nga editing ang postproduction team.
“Lagi,” nagkanayon siya, “kay di sad ingon niana kanindot sa kuha anang gamay kaayo nga camera.”
Mga 3 summers ago, daghan kaayo ang nangabuang sa GoPro. Matag nako sulod og camera shop, daghang batan-on nga gikuyogan sa ilang ginikanan para palitan og GoPro. Usa sa pinakainilog nga ganti sa Press Freedom Week mao ang GoPro.
Apan karon murag nibahar na ang kabuang para sa maong gadget. Tingali na-saturate na ang market sa mga gusto mo-cover og nagkalainlaing kiat.
Gani sa taho sa Wall Street Journal, ang revenue sa GoPro nagsigi nag drop. Gikataho nga 40% ang ilang alkanse niadtong third quarter sa miaging tuig.
Apan duna akoy bag-ong nakit-an nga mahimong bag-ong market sa GoPro: Ang mga ka pulisan sa Pilipinas.
Dunay mga parte sa America diin pagamiton na og action camera ang mga pulis para kon dunay patay, labi na sa highway diin daghan ang magmanihug sakyanan nga armado, daling maimbistigahan kon sad-an ba ang pulis.
Kon maggamit na og action camera ang atong mga pulis, di na sila maakusahan nga nangplanting og shabu o pistula sa mga suspitsado. Ug kon pananglitan di nila gamiton ang ilang camera, nagpasabot kini nga mga ninja cops sila ug angay nga taktakon sa trabaho ug silutan sa ilang kasaypanan.
Kini gong drug war ni Digong nakapaminus sa krimen apan daghan sab ang mga maru nga mosakay niani. Dunay mopatay sa ilang mga karaang atraso unya binlan lang ang patay nga lawas og kartula.
Para mahilom na ning mga pagduda, kinahanglan og istriktong superbisyon kining maong kampanya kontra druga.
Basig mohatag og discount ang GoPro kong bulto ang paliton sa atong gobyerno.