SUAREZ
Dako pa ko’g pagsalig kang Presidente Duterte. Apan supak gyud ko ning iyang plano nga dili ihinayon ang Barangay ug SK elections karong October ug iya lang itudlo ang mamahimong mga opisyales sa barangay.
Sayop ning kahadlok sa Presidente nga modaog gihapon sa eleksiyon ang mga incumbent barangay officials nga nalambigit sa illegal drugs kay ang iyang kadaugan naggumikan baya sa maong krusada.
Nagpasabot nga mas daghan pa kitang mga tarong.
Ang maayong himuon sa Presidente mao nga itribukar ang tanang mga opisyales sa barangay nga nalambigit sa illegal drugs.
* * *
Wa gyu’y mapili nilang duha ug maayong pakungon ang ulo nilang David Chua Lim Jr. ug sa nurse nga iyang napusilan nga si Ephraim Montalbo Nuñal.
Mao ning mga klaseng motorista nga pulos abusado sa kalsada nga angayang i-revoke ilang driver’s license sa taga Land Transportation Office (LTO-7).
Ang video nga nag-viral maoy insaktong basihanan sa taga LTO pagtangtang sa pribilihiyo ning mga kanahan pagmanihog sakyanan.
Paeta kung may napagan pa sa ilang kayabag niadtong miaging Domingo sa kadlawon.
Maglaum lang sab ko nga dili inutil ning gobyernoha pagdakop niining ubang mga tawo nga mi-convert sa atong mga kalsada nga ilang lumbaanan.
Sa akong experience, kapila na gyud ko tugkig hubaghubag niining mga magmanihog sports car nga puwerteng kusuga mosobida ug mologsong sa Veterans Drive Lahug, kalsada nga paingon sa Marco Polo Hotel.
Puwerte’ng abusadoha ning uban.
Kabahin sa isyu sa paghatag og special treatment ngadto kang David Jr., dili gyud kapanghimakak sila si PRO-7 director Noli Taliño.
Una, si kinsa man gud ning abusadoha nga tukawan ni Taliño pagpaabot hangtud nga mo-surrender sa alas 2 sa kadlawon?
Asa man ka mangita’g dinakpan nga ang pagpa-medical check-up didto ra sa kampo sa kapolisan ug wa sa tambalanan?
Ikatulo, nganong wa man pasul-oba og t-shirt sa mga piniriso si David samtang gidala sa piskaliya ug sa korte?
Ika-upat, ngano man nga ang sobra sa napulo ka mga sakop sa Special Action Force (SAF) naka-full battle gear man ug daw sama sa panggubatan ang eksena sa piskaliya pag-escort ni David Jr?
Nganong didto man gibalhog sa prisohan sa mga babaye ug nag-inusara siya?
Ika-unom, nganong duna may mga sibilyan nga gitugtang maoy makabantay ni Lim?
Butang kini nga angay’ng imbestigahon sa Ombudsman kay naklaro dinhi ang special treatment.
Nakamang na si Presidente Duterte sa mga Lim?
Si Peter Lim nga uyuan ni David kinsa gitribukar sa Presidente nga usa ka big-time drug lord nakasayonsayon pag-adto sa Malacañang, pero naay kanhi city mayor Michael Rama nga “drug protector” wa gyud makapaduol sa Presidente?
* * *
Nahurot akong bilib sa security guard sa Saint Theresa’s College (STC) nga si Erwin Valmoria Macua kay taliwa sa kalisod isip usa ka pamilyado, nakagradwar na gyud unya cum laude pa sa iyang baccalaureate degree sa Elementary Education (BeEd).
Pagkanindot sa iyang sugilanon.
Congrats, Erwin ug sa tanang mga nagmalampuson! Wa gyuy kumo sa pagkugi.