SUAREZ
Unsay nakaon ug nainom ni PO3 Eugenio Dela Fuente Santillan nga gitahong midiritso lang og pangamang kang PO1 Genelene Bayron Paragas didto sa Camp Ceperino Genovia sa Bahay, Sibonga?
Suwerte lang si PO3 Santillan nga dili armas ang nabunot sa policewoman dihang nangalit kini sa pagpanggakus, pagpanghawok sa aping ug ngabil niadtong Huwebes sa kadlawon.
Na-inquest na niadtong Biyernes sa hapon si PO3 Santillan sa Provincial Prosecutor’s Office human gikiha sa biktima og kasong acts of lasciviousness nga may piyansa nga 12 mil pesos sa Sibonga Municipal Trial Court.
Segurado ko nga gawas sa kasong criminal, mag-atubang pa gyud sa kasong administratiba kining maong pulis.
Mao ning klaseha sa mga pulis nga di gyud angay’ng padaghanon kay timailhan kini sa pagkabulay-og.
* * *
Samtang magpalami unta niadtong Huwebes si PO3 Santillan, ako naluoy kang PO1 Emmanuel Martinez Sr. nga nagbangutan ning mga tungora human ang iyang anak nga 4 anyos nga si Junior gidunggab- patay sa adik nga si Danilo Montellano Remulta niadtong udtong tutok sa maong adlaw sa may Sitio Tiangihan, Barangay Duljo Fatima.
Paeta gyud ning mga adik. Insakto gyud ning gibalik-balik ni Presidente Duterte nga ang mga adik dili na gyud makadeterminar sa maayong buhaton.
Simple kaayo’g depensa si Remulta sa paghimo niya sa krimen. Sumala pa niya nga samtang miagi siya, gibugal-bugalan siya sa biktima.
Apan dihang iyang giduol, nakadagan ang ubang mga bata ug iyang nakuptan ang hapit na magsingko anyos nga anak ni PO1 Martinez ug maoy iyang gipahimungtan.
Akong tan-aw gihaya sab unta ning kanahan ron kung dead on the spot ang bata. Sus paeta gyud!
Ebedensiya lang gyud ni kung unsa ka daghang mga adik ug mga tarantado diha sa area ni S/ Inspector Edward Sanchez sa Mambaling Police Station.
* * *
Akong mga bisita niadtong Sabado sa among programa’ng Dialogue on the Air sa DYSS Super Radyo nakatan-aw sa unahan nga gubot pas lukot kung dili idayon ang Barangay ug SK elections karong October ug kung itudlo na lang ang manglingkod nga opisyal.
Sila si Cebu Provincial Election Supervisor Lionel Marco Castillano, COMELEC-7 Regional Attorney Enerio Ocariza Jr., Atty. Ian Kenneth Lucero sa DILG ug ABC Cebu City Federation president Philip Zafra miingon nga adto magdaog ang tanan sa Korte Suprema.
Ang Korte Suprema ra gyu’y makadeklarar kung nagsubay ba sa batakang balaod nga i-appoint na lang ang mga barangay officials.
Si Zafra miklaro nga supak gyud ang ABC Cebu City sa postponement ug pagtudlo na lang sa opisyal.
Siya nagkanayon nga di gyud sila mangyugpos ug mipasabot nga ang ilang liga sa national level modangop gyud sa Korte Suprema aron ipadeklarar nga unconstitutional ang mga balaod unya nga mapasar kabahin sa pagsibog sa eleksiyon ug pagtudlo sa mga OIC.
* * *
Wa ko kasabot ning ubang mga tawo nga di gyud makontento sa ilang mga dagway nga gasa sa Diyos.
Ang uban mosungasong gyud sa medical procedure aron pagtagbaw sa ilang dagway ug pamayhon taliwa nga risgo kaayo.
Mao nga alang kanako, di lang seguro mabasol ang mga doctor sa The Icon Clinic sa kamatayon sa negosyante’ng babaye nga si Shiryl Saturnino. Mabasol sab siya, uy!
Ambot kung nganong di gyud makontento nga unta sa file photo sa namatay, nindot na man siya’ng tan-awon human siya nagparetoke.
Basta lagi kuwartahan, wa gyu’y katagbawan ang tawo.
In fairness sa tagdumala sa The Icon Clinic, ilang abogado nga si Atty. Estrella Cordero miklaro nga dili tinuod ang ubang nanggawas nga balita.
Ang iyang giangkon mao nga duha ra ka operasyon ngadto sa negosyante, sukwahi sa unang balita nga tulo. Usa ka minor operation ug usa ka major operation. Sumala pa, gisunod sab ang tanang procedure sa operation.
Sukwahi sab ang gipagawas sa Mandaluyong City Hall nga wa silay permit kay sa pagkatinuod, ang maong clinic iya diay sa Managed Care Philippines
Inc. nga gihatagan og permit sa DOH nga makapahigayon og ambulatory surgical operation.
Sa nahitabo sa negosyante, maghatag kini og warning niadtong way salig sa kaugalingon.