Gerard Pareja
Ang Sugat sa Pagkabanhaw usa ka procession / street drama kada kaadlawon sa Easter Sunday nga mohulagway sa unang panagtagbo ni Maria ug sa nabanhaw nga Jesu Kristo. Pero ambot lang kahag daghan ba ang napahigayon nga pagsaulog sa Sugat kagahapon sa kaadlawon. Unsaon man gud nga ang Sugat gisugat man ni Crising, usa ka bagyo ng mibisita nato ning panahon unta sa ting-init.
(Pero matud pa sa uban, naguba o ingnon ta lang, nausab na kuno ang schedule sa ting-uwan ug ting-init.)
Sa mga nakamatag sayo sa among lugar, may niagi man kuno nga drum and bugle.
Ug may nadungog man ako nga bagting sa kampana. Apan pagkanaog ko, maoy akong namatikdan nga may tubig na sa salog sa among sala ug kusina.
Ug sa pagtan-aw ko sa bentana, taga tuhod na ang tubig sa gawas.
Alas nuybe pa man gud sa gabii gasugod ang uwan, ug sa pagmata ko pagka alas singko, wala pa kini motuang. Ingon niani kamanggihatagon og grasya sa tubig kining si Crising.
Kon matigom pa lang unta nato ang tubig nga gibubo kanato sa mga unos sama ni Crising para magamit nato sa panahon huwaw, kamaayo ra unta. Ambot kon moabot ba kaha kanang panahona nga makamao na kita modakop ug motigom sa mga dagkong uwan. Masusama kini sa palad nga mosawod ug mohatod og tubig sa giuhaw nga baba.
Nindot tumutumoag etymology kining si Crising ug ingnun ta nga gagikan kini sa mga pulong nga Christ Rising.
Apan daghan ang di mahimuot niani, labi na kadtong gipang bahaan ning Domingo sa Pagkabanhaw.
Dili unique sa Pilipinas ang problema sa baha kay bisan gani ang mga First World countries, maigo man usab niani.
Ang unang nasud nga mosulod sa akong hunahuna mao ang Netherlands.
Dako nga bahin sa ilang land area giingon nga below sea level.
Mao nga humot kaayo sila sa baha.
Walay unique o secret solution ang maong nasud.
Kombinasyon sa nagkalainlain nga solusyon ang gigamit sa Netherlands.
Duna silay mga dagkong canal, mga tag-as nga dyke ug mga kinawtan nga lugar nga ang mga tubig birahon sa mga waterpump nga niadto gipadagan sa mga windmill para ipabasa sa mga umahan.
Kanunay kini nilang gihimo.
Ang ato lang sigurong problema kay di kaayo kita kalahutay sa kanunay.
Maproblema kita sa baha, apan makalimtan ta ra usab kining maong problema inig ting-init kanus-a mangalaya ang mga dahon.