Gerard Pareja
Nyor (NG): Nyor, Nagkadaghan naman ang terrorista sa Pilipinas.
Nyor Daku (ND): Wa uy. Nagkadaghan gud.
NG: Ang buot nakong ipasabot nga nagkadaghan na ang ilang kadaut nga gipanghimo.
ND: Kinsa man nang mga terrorista nga buot nimong ipasabot?
NG: Naunsa man sad diay ka, Nyor. Wa man diay ka manumbaling sa mga balita.
ND: Unsang balitaa kabahin sa mga terrorista ang imong gipasabot.
NG: Na, naunsa. Wa diay ka mahibawo niadtong mga Abu Sayyaf nga nanghasi sa Bohol.
Ug Kadtong mga NPA nga misunog niadtong factory sa Davao.
ND: A, kadto. Di man to sila mga terrorista.
NG: Ha? Unsa man diay to sila masahista?
ND: Sa tinuoray lang Nyor, wala pay terrorista sa Pilipinas. Wala pay daghang mga fanatic diri nga magpakamatay paras ilang krusada.
Ang daghan sa atong nasud mao ang mga negosyanting tulisan.
Daghan niani naas gobyerno.
Ang uban naas kapulisan. Ang uban naas private sector nga mang smuggle ug mohimo sa mga nagkalainlaing lakang para makalikay sa buhis.
Ang Abu Sayyaf wa to mangadtug Bohol para makig gubat. Ang mga hanggaw naniid to ngadto kon duna ba silay mga turista nga masaknit kay ilang kidnapon unya ipalukat. Di na molihuk ang mga panuway kon wa silay ma-income.
Ang NPA hagbay ra na nga mangdaub sa mga kompaniya nga dili mobayad nila sa ilang gipangayo nga revolutionary tax.
Kaning mga unggoya ni magpaingoningon nga terrorista para mas kahadlukan sila.
NG: Pagka wa gud diay natog swerte, Nyor. Puros ra diay ni kawatan ug tulisan ang naas ato.
ND: Mulang.
NG: Lain ato Nyor, kumusta mas paring Donald?
ND: Twitter lang gihapon.
NG: Human sa 100 ka adlaw, wa mag mahay ang mga Kano nga siyay ilang gipiling pangulo?
ND: Ang wa ganahi niya niadto nagkagot lang gihapon ang ngipon sa kalagut. Ang mga mibutar niya nagpadayun lag gihapog abiba. Kay matud pa sa survey 96% sa mga namutar niya nauyon mas iyang gipangbuhat.
NG: Unsa man diay nahitabo sa 4%, Nyor?
ND: Murag 1% ang wa mauyon sa iyang pagbomba sa Syria kay wa kini ma subay sa iyang America first policy nga imbis unahon niya ang ilang kahimtang nakig gubat naman nuon kini.
Tingali ang laing 1% nadismaya nga wa niya matuman ang pagwagtang sa Obamacare.
Naa pud tingali 1% nga wa malipay nga mas daghan pang illegal immigrants nga napalagput si Obama sa unang 100 days niani kaysa niya.
Ug nganong wa pa man sugdi ang iyang gipang hambug nga border wall.
NG: Ug ang nahabiling 1%?
ND: Ha? Imo g’yud diayng gikwenta? Aw basig gisom-ulan nas iyang panagway ang nahabiling 1%.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
