SUAREZ
Konbinsido ko nga gi-salvage sa mga pulis didto sa Bohol ang nadakpan nga sakop sa Abu Sayyaf nga si Saad Samad Kiram.
Apan alang kanako maayo ra sab nga pang-ihawon ang tanang sakop sa mga bandido kay dili na g’yud mabangbang ang ilang pagkasalbahis nga mamutol og ulo sa mga inosente nga ilang gipang-kidnap ilabina kung di kabayad sa ransom ang pamilya o ba kaha ang gobyerno.
Wa pa kabayad ang mga bandido sa mga pamilya nga ilang gibiktima sa nahitabong pagsalvage kang Kiram.
Kanus-a man isunod sila si Supt. Maria Cristina Nobleza ug iyang bana nga expert bomber?
Na-unsa na sab ning taga Commission On Human Rights (CHR) nga mo-imbistigar pagpatay ni Kiram?
Porbida g’yud ning taga CHR. Sige lang sila sakay sa panahon.
Maayo unta nga ilang kawoton ang pinaka- ilawom sa ilang konsensiya kung angayan bang hatagan og hustisya ning mga berdugo ug mga satanas.
Alang gani nako mas maayo man ganing rapidohon ang tanang Abu Sayyaf nga mi-surrender unya pasaksihon si UN Special Rapporteur Agnes Callamard.
* * *
With all due respect, wa g’yud ko kasabot niining nahitabo sa lungsod sa Bantayan nga ang naparot pagka-mayor nga si Ian Christopher Escario maoy palingkuron pagka-mayor human gi-technical si Mayor Arthur Despi sa iyang Certificate of Nomination and Acceptance (Cona) sa taga Comelec.
Pagka wa say dungog ni Escario nga molingkod nga wa hatagi’g mandato sa katawhan.
Nganong di man mo-apply dinhi ang law on succession diin automatic ang vice-mayor maoy ma mayor?
Atong ibutang nga nangilad si Despi sa iyang giduso nga Cona human miklaro ang secretary general sa partidong Abag Promdi nga peke ang Cona ni Despi, apan dili diay puwede nga ideklarar nalang siya’ng independent candidate kaysa i-kanselar ang candidacy nga maoy hinungdan nga dili siya kandidato sa piniliay?
Unsa may basihanan nga nangilad si Despi sa iyang Cona? Kung ang secretary general sa Abag Promdi maoy nangilad kay wa kauyon ni Despi sa dagan sa panahon kay way kuwarta, unsa may dag-anan ni Despi sa away?
Gawas niini dugay pa kaayong naka-resolbar ang taga Comelec sa isyu sa candidacy ni Despi.
Ambot kung makadawat ba ang taga Bantayan nga hulipan si Despi ni Escario nga ang naulahi napilde man?
Akong tan-aw, madawat lang seguro si Escario kung ipasubli pag-ihap nga pilde si Despi. Dili ipa-agi sa technical.
Wa makamang ang taga Comelec Manila?
* * *
Nakatayming ko niadtong Biyernes sa hapon nga nakigkukabildo kang Baltazar Tribunalo Jr. nga maoy nangulo sa Cebu Provincial Disaster Risk Reduction and Management Office ug maoy kasamtangang Penro officer.
Wa ko maglangay pagkuha sa iyang habig sa pipila ka mga isyu nga akong nasagap batok kaniya.
Ang unang isyu kabahin sa giingon nga iyang gipasawom sa tubig dagat didto sa baybayon sa Medellin ang patrol car sa Kapitolyo sa PDRRMO.
Sa maong insidente naapil og kaguba ang “Apple” nga laptop computer.
Tubag sa opisyal ning maong isyu nga dili intawon siya yabag nga pagkatawo. Wa niya isawom sa dagat kung dili sa sapa kay miresponde sila sa usa ka trahedya didto sa norte.
Laing butang nga akong gipatubag kaniya mao ang isyu nga duna siya’y dakung cacao farm sa Balamban ug matud pa nga job order employee ang gipatikad ug gipaugmad.
Gi-angkon ni Tribunalo nga may cacao farm siya didto sa Balamban ug dugay na kini matud pa. Mihimakak siya sa alegasyon nga may mga kawani sa Kapitolyo ang iyang gipa-trabaho didto.
Kung kinsa may nagpalakaw ning maong mga isyu mas maayo tingali nga may kaisog pagpatim-aw ug iproyba kining tanan.
Mas maayo sab tingale nga lili-on kini ni Governor Junjun Davide.