SUAREZ
Ang pagdakop sa taga National Bureau of Investigation (NBI) kang Noel Ababa Maricuelo kinsa nagpa-abogado-abogado, nakapalab-as sa akong panumduman sa isyu niadtong usa sa mga sinaligan ni kanhi Cebu governor Vicente Tingting Dela Serna nga si Rolando Puaben.
Puwera gaba sab to si Bay Lando kay espiso kaayog bakak ug puwerte’ng pabaga sa nawong kay bisag dili abogado ni-insister g’yud nga siya abogado dihang akong gikonprontasi sa ilang opisina kaniadtu diha atbang sa Cebu South Bus Terminal.
Di g’yud ko malimot kang Bay Lando kay nabalik-balik niyag litok nga “abogado lagi ko” dihang akong gipangayo-an sa iyang number sa roll of attorneys ug sa tuig nga siya nakapasar sa bar exam. Wa g’yud siya kahatag.
Mas kuyaw to si Bay Lando kay kanunay to siya’ng mo-enter og appearance sa mga branches sa MTCC sa 4th floor sa karaang building sa Cebu City Palace of Justice nga naka-kurbata ug magbitbit og attaché case.
Mas bintaha nalang si Maricuelo kay ang iyang pagpangangkon nga abogado ngadto sa kapitan sa barko nga si Kirby Magdadaro kutob ra sa paghimo sa complaint ug ubang pleadings sa kasong ejectment and damages batok ra sab sa iyang kadugo.
Nag-atubang na og kasong estafa sa korte sa Mandaue RTC si Maricuelo niadtong Huwebes.
Kuyaw kung mamiktima siya’g lain kay 18 mil ray piyansa sa iyang kaso.
Pero unsa ka tinuud nga duna pay laing mga biktima si Maricuelo? Maayo unta kung mopatim-aw sila.
Unsa sab ka tinuud nga duna pay laing naglihok nga nagpa-abogado-abogado?
Aktibo pa ba ang IBP paggukod sa mga impostur sa legal profession?
* * *
Unsa may garantiya nga luwas na g’yud sa risgo ang atong mga barangay kapitan kung sila tugotan nga makakupot og armas bisan gawas sa ilang barangay?
Alang nako usa ra g’yud ka isolated case ang pagpusil kang Mantuyong Barangay Captain Antonino Maquilan sa Mandaue.
Sa sitwasyon ni Maquilan nga naka-wheel chair niadtong higayuna, bisan pa tingalig mga high-tech iyang armas, wa gyu’y dag-anan.
Daghan naman gani’ng panghitabo sa atong kapolisan nga bisag insakto sa karga sa armas apan napatay man gihapon. Kapitan pa nga way focus sa iyang seguridad?
Kung isyuhan man sila sa gobyerno og armas, ang pangutana kung qualified ba sila? Dili kaha hinoon mosamot ka abusado ug gamiton nila ang armas pang-proteksiyon sa ilang kalambigitan sa pagbaligya sa illegal nga drugas sama kang Tupas Ronda Barangay Captain Eugene “Aye” Miñoza?
Kung risgo na g’yud ang mga tarong nga mga kapitan ning higayuna tungod sa gubat sa illegal drugs, dili ba gud mahimo nga maka-provide ang PNP og mga personnel aron mo-escort sa mga kapitan sa mga opisyal nga lakaw?
* * *
Daghan kaayong salamat sa taga Department of Engineering and Public Works (DEPW) sa Cebu City Hall kay nahamis na intawon ang mga kalsada paingon sa Saint Therese Parish Church diha sa Barangay Lahug.
Grabe g’yud intawon ka lubak-lubakon ang Edison Street ug ubang sikbit nga mga agi-anan niadtong wa pa nila tapaki. Daghang nangatakilpo.
Maglaum ko nga matrabaho sab nila ang ubang mga kalsada nga gireklamo intawon sa mga magbubuhis sama diha sa Don Gil Garcia Capitol Site, paingon sa Camp Marina Lahug, sa Panganiban sa Pahina Central, sa ruta sa mga PUJ sa Barangay Apas, ug uban pa.