Gerard Pareja
Ang di kahibawo mosuwat sa iyang ipamulong nga si Senador Tito Sotto mi suhol og usa ka tapulang manunulat para kaniya.
Tapulan sa ingon nga nangopya kini word for word gikan sa usa ka artikulo ug gipasulod kining maong mga pulong ngadto sa diskurso sa senador nga walay paghisgut kon diin kining maong mga pulong gikan.
Hinungdan nga daghan ang mipyait og –Plagiarism.
Ang nakaparat kay ang problima tingali niining mga tigsulat para ni Sotto, dili tapulan mosuwat kun dili, tapulan mohunahuna.
Mao nga wa madugay nangopya na usab silag laing mga pulong para isulat sa laing diskurso sa senador.
Ang ilang gikopya mao ang mga pulong gikan sa kanhi senador sa Estados Unidos nga si Robert Kennedy (nga igsuon sa kanhi pangulo sa maong nasud). Hinuon ila kining gitinagalog.
Typical sa mga politikong Pinoy misuway paglusot si Sotto pinaagi sa pag ingon –Ngano, kahibawo ba diay mo tinagalog si Kennedy?
Karong bag-o napandul na usab ang senador dihang mipasiaw siya sa usa ka committee on appointments hearing.
Dihang gituki ni Sotto ang kinabuhi ug kridibilidad sa nominee ni Duterte pagka secretary of Social Welfare nga si Judy Taguiwalo diin miyumaw nga usa ka single parent.
Okay ra unta to apan naunsa man nga mipasiaw mag kalit ang elder statesman sa Eat Bulaga.
Out of the blue mihisgut siyas street slang sa tagalog para sa pinaangkan nga “na-ano lang.”
Ug nangatawa ang tanan. Isip usa ka bisdak, di kayo naku makuha ang malisya sa maong mga pulong.
Pero sa punto lang nga daghang nangatawa, nakuha na nato nga usa kini ka yagayaga.
Ug tuod man giburahan si Sotto sa mga taga Gabriela.
Si Sotto nga misuporta sa nominasyon ni Duterte kang Taguiwalo nangayog pasaylo sa mga nasakitan sa iyang gipangyawit.
Nagkanayon kini nga duna siya duha ka anak nga babaye nga puros may anak ug walay bana ug maong wala sa iyang intension ang pag panghimaraut kang Taguiwalo.
Apan dili kini ang unang atraso ni Tito Sen sa mga aktibistang kababayen-an.
Kay sa Eat Bulaga niadtong miaging tuig dunay babaye nga contestant sa ilang programa nga mi sugilon kabahin sa iyang naagian nga gi-rape siya sa iyang kainum nga lalake.
Mipasiaw usab si Sotto ginamit gihapon ang street lingo.
Miingon siya –“naka shorts habang nagsho-shot?”
Kon sa binisaya pa kini daw gibasol niya ang gilugos tungod kay nagpakigol.
O sa laktud nga paglaktaw gibasol niya kini sa pag igatigat.
Ambot kon danghag ba kini si Sotto o dimalason lang g’yud parte sa iyang ipangyawyaw.
Maayo untag di ni nato ma president kay matakdan unya ta simbako sa dimalas ani.