SUAREZ
Manghinaut ko nga tinud-on ang mga pasalig nila ni assistant Cebu City Hall Engineer Nilo Igot sa Department of Engineering and Public Works (DEPW) ug Marie Mignon Nillama tigpamaba sa Department of Public Works and Highways (DPWH-7) nga matarong nila ang mga nangagusbat nga kalsada.
Ang duha ka mga opisyal maoy akong mga bisita niadtong Sabado atol sa among radio program nga “Dialogue On The Air” sa DYSS Super Radyo nga nagtuki bahin sa estado sa atong mga kalsada nga daw sama sa agi sa kaon sa kasag nga kagang.
Silang duha pulos gilamok sa mga tax payers nga mi-interact atol sa programa tungod sa kahinay ug kuwestiyonable’ng pagguba sa mga kalsada bisag maayo pa.
Si Engineer Igot mi-esplikar nga ang kalangay nila pagtapak sa mga libaong sa mga city ug barangay roads mao g’yud ang kakuwang sa budget.
Sumaa niya nga 25 milyones pesos ray gi-aprobahan sa konseho kaniadtu alang sa aspalto gikan sa 60 milyones nga iyang gipangayo.
Naglaum siya nga tungod niining mayoriya karon sa BOPK sa konseho maka-kuha na siya og insaktong budget uban sa pasalig nga masulbad ra kining tanan.
Sa habig ni Nillama sa DPWH, mipasabot nga kining pagpangguba sa kadalanan karon bisag tan-aw sa uban nga maayo pa, dili tinuud nga komisyon sa proyekto maoy gi-apas.
Silang duha si Nillama ug Engineer Igot pulos midepensa nga dunay ilang ekipos nga technical kaayong maka-detect nga guba na ang usa ka dalan sama sa estado karong bag-o diha sa Fuente Osmeña paingon sa Kapitolyo.
Laing depensa sa taga DPWH nga ang laing hinungdan sa mga proyektu nila nga malangay ilabina sa widening diha sa San Fernando mao ang pag-acquire og road-right- of-way pinaagi sa expropriation proceedings sa korte.
Samtang kabahin sa estado diha sa Pope John Paul II Avenue kanhi San Jose Dela Montaña sa pagbutang og dagku’ng culvert alang sa flood control, gipasabot ni Nillama nga hinapos ning buwana mahuman na og balik normal na ang pag-agi sa mga sakyanan.
Apan ang laing problema nga gi-atubang karon sa DPWH ug sa kontraktor diha mao ang pasangil sa mga apektadong negosyante nga tungod sa way koordinasyon ngadto sa mga telecommunication companies hangtud karon putol ang ilang mga linya sa telepono ug internet kay pasagad lang og kawot.
Balik sa DEPW, misaad sab si Engineer Inot nga karong simanaha ilang ayohon ang dalan Panganiban ug Don Gil Garcia nga dugay nang gitagawtaw sa publiko. Hinaot pa!
* * *
Naundang na ang pang-warta sa mga guwardiya diha sa Qimonda IT Center – Cebu City Palace of Justice human akong gi-exposed kining maong isyu.
Si Henry Espinoza nga maoy in-charge sa security sa korte mitug-an nga gipangkasab-an ang mga guwardiya sa ilang mga labaw ug gipa-undang kadtong ilang pagpa-abang og tag 25 pesos sa long sleeve nga way utaw, way laba ug nanimahong agop-op.
Ang mga guwardiya mipahimolos kaniadtu sa pang-warta sa estriktong palisiya sa korte nga bawal makasulod kadtong mag-sleeveless ug mag-short.
Ang uban nga mao pay pagtaak diha sa Qimonda ug wa masayod sa mga patakaran unya nakasul-ob og sleeveless, mapugos g’yud pag-abang.
Karong bag-o dunay usa ka huwes nga good Samaritan nga si Judge Lynna Adviento kay nagdala siya og 20 ka mga blazers aron ipagamit nga libre sa publiko.
Unya ang nakanindot pa g’yud kay bag-ong nilabhan, inutaw ug humot pa g’yud.
Kung si Judge Lynna nakahuna-huna niining maayong butang, nindot sab tingali nga dunay mopahuwam og slacks ug tiktak aron wa nakoy makit-an nga empleyado sa korte nga mag-short ug mag-tsinelas.