Gerard Pareja
Giwitkan ni Melania Trump ang kamut sa iyang bana nga si Donald Trump dihang buot kining makig holding hands kaniya sa ilang paglakaw sa red carpet sa Ben Gurion Airport sa Tel Aviv, Israel sa unang biyahi sa gawas sa bag-ong President sa USA. Basi gihilasan lang si Melania nga lovey-dovey atubangan sa mga opisyal sa Israel.
Dili kini ang unang higayon nga giwitkan ni Melania si Donald. Sa White House dihang gatukar ang ilang national anthem ug wala mobutang si Trump sa iyang tuong kamot sa iyang walang dughan, giwitkan ni Melania ang siko ni Trump ug dihadiha dayon mibutang kini sa iyang kamot sa iyang dughan.
Kini gud si Trump, kon way mowitik niani magpataka man lang gud kinig dasmag sama sa nahitabo sa usa ka pictorial uban ang mga pangulo sa mga nasud nga sakop sa North-Atlantic Treaty Organization (Nato).
Buot ni Trump magpatunga sa maong pictorial apan gababag sa iyang agianan ang prime minister sa nasud sa Montenegro.
Aw, babag diay ka ha, pwes iirog tika. Maong gikuptan ni Trump ang duha ka abaga sa maong prime minister ug giduot niya kinig padaplin. Tingali kon diha pas Melania basig gilabtikan tingali niani ang dunggan ni Trump.
Misantop sa akong hunahuna nga kon diha pa tingali ang tig witik ni Mike Rama niadto basig di to siya magsiguig balak-kanta-hilak ug magpunay og sul-ob og mga hugyaw nga panamit.
Samtang si Digong giwitkan ni Chelsea Clinton (nga anak ni Bill ug Hilary) sa Twitter dihang ang atong President mikomedya na usab kabahig rape. “Not funny. Ever” nagkanayon ang batan-ong Clinton.
Ug midugang siya nga usa ka “murderous thug” ang atong Pangulo. Unsaon nga limtanon man gud nis Digong humana baya ni siya maproblema niadtong iyang rape joke sa usa ka Australian hostage nga gi-rape patay sulod sa bilango-an sa Davao.
Giwitkan usab si Digong sa duha niya ka general nga mialma sa iyang gi-ingong nasudlan og ISIS ang Marawi. Kay alang sa mga general gapa ISIS-ISIS lang kining mga bandido nga Mauti group para lang padugang sa pusta.
As expected giwitkan usab si Digong sa mga taga Luzon sa iyang pagdiklarar og martial law sa tibuok Mindanao. Hinuon ang mga hinungdan, ang mga molupyo sa lugar ug sa mga palibut nga lugar nga gihasi sa pundok sa Mauti dako mang uyon sa gihimo ni Digong.
Usahay makaayo man sad ning mga ginagmay nga witik ug labtik.