Papa Digs

By: Gerard Pareja June 18,2017 - 09:28 PM

Gerard Pareja

Digong, amahan ning nasud.

Naa unta mi pipila ka hangyo nimoning Father’s Day.

Una, ilisi na intawon ning imong Justice secretary. Gakiat man lang agi ani. Gatuo tingali ni siya nga “cute” ning iyang inamaw. Feeling Pontius Pilate man kayo ni siya pagpatung niyas entablado niadtong panagtapok sa imong mga supporters sa ilang pagsaulog sa Edsa.

Nangutana man nis katawhan kon kinsa kunoy sunod nga ipa-priso. Ang mga wa say lingaw misyagit og: Trillanes! Trillanes!

Nakahinumdum tingali kas eksina sa Biblia diin gipapili ni Pilato ang mga tao kon kinsay angay buhian si Kristo ba o si Barabas. Gatuo tingali ni siya nga apil ang pagka stage actor ning iyang trabaho isip Justice secretary. Naka piso nuon siya ni Grace Poe.

Ug dihang galikay ang tanan nga madagma ning gitawag og “fake news,” ang karaho naghimog iyang pautot.

Matud pa niya didto ang duha ka senador sa oposisyon sa Marawi ug nakigkita sa mga pamilyang Alonto ug Lucman.

Dayon mipakita siyag hulagway gikan sa iyang cell phone sa maong giingong panagtigum.

Apan wa pa gali makaklaro ang iyang gipatan-aw niani iya dayon kining gihipos.

Dayon mibuhat dayon siyag intriga nga duha ka semana gikan sa ilang pagbisita miulbo ang Marawi.

Mihatag pa g’yud kinig bitik-witik nga kon maaprobahan nga may kalabutan sila sa milyones nga napalgan sa kampo sa mga rebilding Maute posibli nga usa ka destabilization effort nga giapluyohan sa oposisyon ang maong hitabo.

Apan may nakakuha man sa hulagway nga iyang gipasiplat ug nga dili man diay kadto sa Marawi nakuha.

Didto sa Iloilo gikuha ang maong hulagway ug niadto pa kining 2015 gikuha. Ug sa duha ka senador nga iyang giingon, si Trillanes ra ang didto ug wala si Bam Aquino.

Naunsa man ning imong Justice secretary nga daw gusto mang mo-audition sa Bubble Gang. Puno na ra bas mga talent ang maong salida.
Kadto na lang imong abogado nga si Panlilio maoy ipuli ani.

Unya lain pay ato, undanga na tingali nang imong pasiaw kabuhis panglugos.

Tangtanga nas imong joke repertoire ang rape.

Dili man gud kabahin lag sex kining rape, violent crime man gud kini. Unya nakig away na hinuon ka ni Chelsea Clinton.

Ka ahak baya, uy. Bilib mis imong pagka impromptu pero mas maayo tingalig naa kay script o bisan man lag outline nga imong sundon para dili ka molikuy sa imong mga pakighinabi.

May untag matipi na nimo nang tanang Maute ug mahipos na nimo ang tanang drug lord ug pusher para ang traffic nasad ug ang hinay nga internet maoy imong lihukon.

Unya ayaw tawn mig kalimti diris Sugbo kay dia ra bay among kongrisman nga tulibag og pangisip nga buot maghimog subway sa lugar nga humot kayo sa baha.

Dinhi lang sa ta kutob, Papa Digs. Ug hinaot nga tagaan kas kahitas-an og maayong panglawas ug nga patas-an pa ang medyo taas na nimo nga kinabuhi.

Ang imong follower,

Salins Hulbot.

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Digong, Digs, Duterte, Papa, PRRD

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.