Gerard Pareja
Sa buhi pa ang akong amahan daw diha siyay buot likayan sa pag gamit og sapot gikan sa ukay-ukay.
Pasiaw pa niya sa akong manghud nga mahiligon kaayug ukay-ukay: “Unya nakasiguro ka nga buhi pa ang tag-iya ana?’
Maingon ta nga daw dunay anti-fetish attitude ang akong amahan niadto.
Tingali kay nisulod naman ang porn mentality sa mainstream nga panghunahuna ang kasagarang pagsabot sa pulong nga fetish mao ang sexual fetish.
Mao kini ang kahulugan sa maong fetish: “a sexual fixation on a nonliving object or non-genital body part.”
Apan dili ra kini maoy kahulugan sa maong pulong. Ang pinaka common nga fetish sa katilingban nahulog niining maong definition: “the attribution of religious or mystical qualities to inanimate objects.” Dinhi maapil ang mga habak, anting-anting ug lumay.”
Apan kon atong mapaluagan kining maong definition masulod niini ang mga butang antiques, collectibles ug rarities. Ug dili na g’yud tantong
“religious or mystical” ang katarungan sa mga collector. Daw emulation, ego ug personal empowerment among peers na ang ilang driving force. Freudian nga biga.
Tataw man kayo nga ang libro para basahon. Apan duna koy mga kaila nga magsigig pamalit og libro para sa ilang collection bisan pa man og wan a silay panahon ibasa niani. Malipay silang magtan-aw sa ilang book shelves nga na puno sa ilang paboritong author o genre. Ug ang mga hard-core ganahan mopalit og karaang edition, labi na kon first printing kini.
Hisgutan ta pananglitan ang relo. Ang relo para paghinumdom kanato sa oras. Apan nganong mopalit ka man og Rolex nga duna may G-shock o Seiko.
Nganong mopalit ka man og G-shock nga makuha mo man gihapon ang oras sa imong cell phone? Ug dinhi mosulod ang social aspect.
Di ba ngilngig kayo ka kon ikaw ray dunay Rolex sa kapihan nga imong istambayan? Unya di ba luoy kayo ka kon ikaw ray way Rolex sa imong mga kauban sa kapunongan. Dunay social fetish function ang maong relo.
Dili ako exempted ning gitawag og fetish. Malipay ko kon makakupot akog karaan na kayo nga lens sa camera. Daw bation ko nga may connection ako sa mga karaang nanagiya nianing maong lente.
Ug nga paminaw ko nga makakuha akog mga nindut nga hulagway tungod niani. Apan maurag bunga ra kini sa akong pagka hanggaw.
Misulod man gud kini sa akong hunahuna karon kay niadtong miaging gabii mitipon ako ning pundok nga managtigum matag duha ka buwan para maminaw og plaka. Ganahan ako ning ilang pundok kay parehas kamig mga hilig sa music.
Ug mga suhito usab kini sila sa ubang butang nga interesado usab ako.
Apan daw di nako makuha ang ilang kalipay nga makapatuyok silag plaka sa turntable.
Alang kanako hasul na kaayo ang pag-amping ning mga vinyl, mga speakers ug mga dagum sa turntable. Malipay naman ko sa mp3 nga motukar sa akong cell phone.
Apan di man gud tingali mawala sa tao ang kalipay nga makapanag-iya og mga butang.