Lloyd Suarez
Unsa may ponto ug direksiyon sa ilusad nga imbistigasyon sa kapolisan sa paghikog-patay sa 21 year old nga single mom nga nag-live streaming sa iyang Facebook account atubangan sa iyang dos-anyos nga anak diha sa Barangay Kamputhaw niadtong petsa tres?
Kung estorya lang sa mga silingan nga nanabi kanila si Kiane Shannon Sophie Cañares nga biktima sa rape sa mismong sakop sa pamilya, di ba mahulog nga hearsay?
Unya kining hearsay, makabarug ug makapakonbikto ba kini unya sa akusado?
Bisan ako nakabasa ko niadtong gi-post sa Facebook sa usa sa mga silingan nga nag-detalye sa posibleng hinungdan sa paghikog ni Kiane apan medyo imposible man.
Di sab ko motoo nga ang iyang inahan way pagbati kaniya.
* * *
Ambot kung tinuud ba gyud ang alegasyon sa 13-anyos nga batang babaye nga gi-rape siya niadtong petsa 4 sa lawyer-broadcaster.
Kay samtang ang biktima mi-insister nga gilogos gyud siya apan ang gipasanginlan hugtanong namakak.
In fairness sa gi-akusahan akong nahibaw-an nga bag-o pa kining minyo sa iyang guwapa nga asawa.
Ang mga misimpatiya sa lawyer-broadcaster miingon usab nga imposible kaayong daginoton ang namasangil kinsa usa ka libod suroy. Gitoho-an usab nga igo rang mangwarta ang giingong biktima.
Hinoon husgado nay motimbang-timbang unya niini kung duna may probable cause.
* * *
Pagka wa gyuy hinungdan sa security measures nga gipatuman karon sa mga guwardiya diha sa Kapitolyo.
Nahug nga sobra ra ka over acting (OA). Natapos naman unta ang atong hosting sa ASEAN Summit apan gipadayon ni Mr. Bobby Legaspi ang hugot nga seguridad.
Ang mga tawo nga mosulod nga nanglakaw lang ug bisan mga empleyado sa piskaliya, taga Public Attorney’s Office (PAO) ug mga sakop sa media pangitaan nila og ID.
Ipatangtang ang helmet niadtong mag-motor unya mohimo silag search sa mga sakyanan ug hilngon kung wa bay bomba.
Tungod usab sa ka OA nila nakamugna hinoon og traffic niadtong Biyernes sa hapon kay gi-one way nila ang kalsada sa Capitol premises. Ang entrance habig sa Escario ug exit sa M. Velez.
Maayo tingale nga tan-awon kini ni Governor Junjun Davide kay nakahasol na kini ug daghan nang reklamo.
* * *
Wa gyuy puangod ang kontraktor ni-anang on-going excavation activity alang sa pagtukod og building diha sa may Edison Street Barangay Lahug unahan sa Saint Therese Parish Church kay ang ilang kinabkab nga yuta nga isakay sa dagkung truck pasagdan lang nga mangatagak sa kalsada.
Gumikan sa ilang way pagpakabana sa epekto, ang kalsada nga bag-o lang gi-aspalto sa Department of Engineering and Public Works (DEPW) sa
Cebu City Hall nabulitan intawon sa hinagbong nga mga kinawot.
Sa init nga panahon puwerteng aboga sa lugar ug puwerte sang lapuka kung mag-uwan.
Kung di mabadlong ang pagka-iresponsable sa kontraktor posible nga maguba na sab kanang maong kalsada diha sa Edison Street nga bag-o pang gi-aspalto.
Akong nahibaw-an sa taga DEPW ug sa taga Department of Public Works and Highways (DPWH) nga puwerte diay’ng mahala sa aspalto kay 20 milyones pesos ang presyo matag 1 kilometer nga kalsada.
Aron magmigkaw ning mga kanahan maayo tingale’ng pamoltahon sa gobyerno. Apilon kining mga nagpa-car wash ug ubang mga responsable pagguba sa atong kadalanan.