Gerard Pareja
Ambot kon aduna bay Cine Europa karong October.
Ambot kahag mopila ba gihapon ko. Pwerti nakong adikag sine niadto. Israeli Film Festival, French Film Festival, Eiga Sai (Japanese), Sinulog Short Film Competition, Korean Film Festival, di ko ni sila sipyaton. Diha pa gani niadtoy mga Film Festival sa China, Spain, Australia ug New Zealand pero wa kini molungtad.
Kon nasud maoy basihan, alang kanako ang South Korea maoy pinakamaayo mohimog sine. Dayon ang Israel. Ug Sundan kini sa Japan ug France. Maayong motahi o mogansilyo og sugilanon ang S. Korea. Gikan sa mga tiguwang nga nahigugma paingon sa bata nga autistic nga miduwag softball, suyopon ang imong attention.
Ang mga Israeli, comedy man o drama ang ilang himuon, kanunay kining gapalandung sa kamatayon. Ang mga hapon mayo kayo mopa contrast sa saba ug sa hilum ug ingon man sa pagpahinay ug pag-papaspas sa salida. Hilig og pakatok ang mga French.
Tungod lagi kay libre man, unya wa sad kuy lingaw, tibuok adlaw ko sa mall para mopila ug motan-aw sa mga pasundayag. Apan karon tungod kay dali na mosakit akong mata ug dali nasad ko tugnawon nawa ang akong kadasig nga motan-awg sine sa mall. Unya naa pa g’yud ang baha nga kalitkalit lang mobutho nga makapa stranded kanimo sa mga mall. Basa kanunay imong sapatos. Naunsa man sad ni atong mga mall nga suki man kaayos baha.
Pero wa kini magpasabot nga di nako movie fan. Gani mas daghan nakog nakit-an nga sine karong tuiga kon itandi sa milabay nga mga tuig. Dili na lang hinuon sa mall ko motan-aw.
Na ra kos computer motan-aw. Maayo man ning sa computer kay di na ka mopliti paingon sa mall. Ug naa koy dialog nga di madakpan i-rewind man nako ang salida. Ug kon duna koy di masabtan, i-pause sa nako ug i-Google ko ang topic.
I-pause ko usab kini kon mangihi ko. Ug sakit na akong mata pawngon ko kini ug tiwason inig ka ugma. Sa laktud nga pagka yamyam wa nakoy gana sa big screen.
Apan niadtong Sabado gitagaan kog assignment sa akong amigo pag cover sa usa ka event sa SM Seaside. Na unsa ba nga ang first screening man diay kadto sa pelikulang “Patay na si Hesus.” Usa ka indie movie kabahin sa usa ka pamilya nga motambong sa bilar sa ilang amahan nga mibiya kanila. Kon indie movie lover ka o interesado ka sa mga binisaya nga pasundayag ayaw kinig sipyata inig gawas niani karong Huwebes. Daw European ang mga pakatok. Kumplitos mga pa shock effect.
Apan kon regular moviegoer ka lang basig ma-iritar ka sa kadaghang pakapin nga punch lines ug sa mga way undang nga pagbutho sa mga subplots. Isip usa ka comedy daw apiki ang timing sa delivery. Tag-as ra usab ang ubang dialogs nga murag naminaw kag drama sa radio.
Ang ako rang problima isip usa ka accidental moviegoer nga gibayran isip maniniyot sa maong event mao ang grabing baha sa gawas sa SM Seaside.