Gerard Pareja
Nakahibawo nagud ta daan nga mapildi g’yud si McGregor pero nanan-aw lang gihapon ta. Tingali nanghinaut ta nga magabaan ning siguristang mangingilad nga si Mayweather ug ma aksidentihan siyag kaigo sa kumo sa iyang binayran. Apan murag di g’yud madutlan og gaba ang panuway.
Mao tingali nga adunay after life para paglatus sa mga panuway.
Klaro man nga pangwarta ra say tumong ni McGregor. Bisan sa iyang mga damgo wa kini magtuo nga modaug siya. Daritsug binaliay ang duwa sa mixed martial arts nga iyang naandan. Hasmag, layug ug luok ang padagan niani. Mas daghang ginadili sa boxing. Way layug, way dukol, way luok, way patid. Importante kaayo ang paggamit sa tiil ug paa isip hiagiban sa mixed martial arts. Walay patiray sa boxing. Ning maong kondisyon mura na og gipiangan si McGregor.
Mugbo ra sab ang mga away sa mixed martial arts. Dali ra kining magdaug. Walay mixed martial arts nga moabot og 12 rounds. Daghan kanila ang mangamatay kon ingon ka taas ang ilang mga bangga. Wala maanad sa lahutay ang mga mixed martial artists. Nianing puntuha dihadu na usab ang bungotong Irish man. Klaro kaayo nga maghuwat lang si Mayweather kon kanus-a mahutdag hangin kining puti niya nga kontra ug unya iya dayon kining dabudabuhan.
Gawas nga ubos pa kaayog panuigon si McGregor kon itandi ning hari sa lihaylihay, premiro pa usab kining duwa sa boxing ning tawong napunog patik ang lawas. Samtang ang marukoy nga Mayweather gatubo nga boxer. Mao kini ang iyang panginabuhi ug karon mao nay iyang dakong negosyo.
Sa ato pa grade one pa intawon si McGregor sa boxing si Mayweather maestro na sa doctorate program niani.
Hinuon bisan pa man sa pagka perdigana sa pwisto ni McGregor diha gihapoy pila ka butang nga nalingaw kita ning mga pangilad ni Mayweather.
Usa niani mao ang purma o fighting stance ni McGregor nga susama sa mga hulagway nga atong makit-an sa mga karaan nga basahon sa boxing.
Kadtong boxing ba nga wa pa ma tao ang atong mga apuhan.
Apan ang pinakalingaw mao kadtong matag gakus, kiyud ug dukol ni McGregor kang Mayweather. Daghan ang mi korus og –Da! Da! Da! Kada hitabo niani. Wa ta kahibawo og unsa ka kusog ang dukol nga gihimo ni McGregor sa iyang kontra nga mao ra say producer sa maong away. Apan makalingaw kaayo tan-awon ang reaksyon ni Mayweather kon gakson na siya gikan sa luyo sa iyang kontra. Daw gihiliasan siya sa romansa.
Wa nay kontrang lig-on ang talawang Mayweather, negosyo na lang ning iyaha. Ug kita nga way lingaw sa adlaw nga domingo nanganduy na lang nga maunay siyas iyang tari.
Dili orig si Mayweather ning iyang kabuang kay niadtong 1976, diha na ang Muhammad Ali vs Antonio Inoki diin si Ali nakigbangga sa usa ka Japanese Wrestler nga way gihimo gawas sa paghayang ug paggamit sa iyang mga paa pagsuway og dakop kang Ali. Murag nahimong kasag si Inoki.
Tingali sa sunod mangita nig Aliwas si Mayweather nga ika bangga para moabot na og 51 wins, zero loss ang iyang record.