Gerard Pareja
Samtang nagtigom og igong kusog si Irma para iyang gamiton paglaparo sa Bahamas, Cuba ug Florida, samtang nag pakisusi si Trillanes sa mga patik sa bukobuko ni Pulong, samtang si Maria napakyas sa iyang laraw nga maka grandslam, mipanaw si Walter Becker.
Si Walter Becker ang kauban ni Donald Fagen sa pagporma sa influential ’70s music group nga Steely Dan. Ang Steely Dan (SD) usa ka rock band apan jazz ug world beat ang tempo sa ilang mga kanta. Ang nakalahi sa uban mao ang ilang lyrics diin daw adto modapig sa mga tao ug panghunahuna nga dili popular. Ang ilang mga kanta mo champion sa anti-hero.
Bisan (o di ba tingali tungod) sa iyang pagka palpak sa paglansang sa tanan niyang gipang-gukod, matawag natog anti-hero si Trillanes. Kay samtang ang mayoriya nagpaluyo kang Duterte, nagpadayon gihapon si Trillanes sa pang panghasi sa kagamhanan ni Digong. Daw buot niyang mahimong Don Quixote sa senado nga buot modasmag sa tanang butang nga may koneksyon kang Duterte.
Ang pinakasipa nga kanta sa (SD) nga mopadayag sa ilang anti-hero nga panan-aw mao ang “Don’t Take Me Alive.” Nagkanayon ang korus niani:
“I’m a book keeper’s son/I don’t want to shoot no one/Well, I crossed my old man back in Oregon/Don’t take me alive//Got a case of dynamite/I can hold out here all night/Well, I crossed my old man back in Oregon/Don’t take me alive.”
Matawag tag usa ka fallen angel si Maria Sharapova human siya masuspenso sa giingong paggamit niya og ginadiling druga nga makatabang sa iyang abilidad sa tennis. Natunga ang kalibutan sa tennis sa iyang pagbalik. Ang mga kalalakihan nalipay nga motan-aw pagbalik sa iyang kaanyag. Samtang ang mga kaatbang niya sa grandslam miingon nga dili angay pabalikon ang usa ka tikasan. Dunay anino sa anti-hero ang pagbalik ni Maria sa korte.
Samtang ang kanta nga “Deacon Blues” sa Steely Dan daw panamilit sa usa ka criminal diin ang korus nagkanayaon:“I’ll learn to work the saxophone/I’ll play just what I feel/Drink Scotch whisky all night long/And die behind the wheel/They got a name for the winners in the world/I want a name when I lose/They call Alabama the Crimson Tide/Call me Deacon Blues.”
Suwayi pag-personify si Irma (nga ig-agaw ni Yolanda). Suwayi pagtugkad ang mga posibling katarungan kon nganong iyang gipanglarut ang mga lube, iyang gipanglangkat ang mga atop, iyang gipang-itsa ang mga barko ug nganong iyang gihian kining mga dakbayan nga daplin sa dagat. Sa imong pagsuway pagsabot sa iyang gihimo, makit-an mo ang kalag sa anti-hero.
Ug samtang mosaka ang presyo sa tubig ug gasoline sa panahon sa dakong katalagman, di kalikayan nga dunay mangamatay sa mga managilug sa maong mga komunidad. Ug niani mahinumduman ko ang unang stanza sikat nga kanta sa SD:“In the mornin you go gunnin’/For the man who stole your water/And you fire till he is done in/But they catch you at the border/And the mourners are all singin’/As they drag you by your feet/But the hangman isn’t hangin’/And they put you on the street.”
Maingon ta nga kon di madungog ang tingog sa anti-hero, dili makumplito ang hulagway sa kalibutan.