Gerard Pareja
Wala pa matao si Marcos diha na ang pang abusos mga pulis. Apan nganong daw mas migrabe naman kini karon? Aniay pipila ka hinungdan:
Populasyon. Nidaghan na ang katawhan. Gipadaghan usab ang pulis nga mobantay kanila. Ug kay daghan naman ang pulis, midaghan na usab ang abusar nga nahimo.
Social Media. Tungod sa Facebook ug uban pang site sa internet dali na kaayong masibya ang mga abuser sa kapulisan. Niadto dihay mga di maayong binuhatan ning mga law enforcer nga wala masayre sa mga tao kay wa man kini masibya.
Digong. Midagan si Duterte pagka pangulo ubos sa plataporma nga kontra druga, kontra krimen. Tungod niani dakog importansya ang gihatag natong tanan sa pagpadagan sa pagpatuman sa iyang kagamhanan sa balaud. Kon ang nakadaug pa nga kandidato ga plataporma pa og ekonomiya o moralidad dili ingon niani ka intense ang focus sa police abuse. Unya daw wala na sab kaayo untay moalma kon bisan ang pulis moapil pag pamaligyag shabu.
Oposisyon. Ang tanang patay sa kadalanan, bisag wala nila kini ma-imbistigar, tawgon na og EJK o extrajudicial killing, sa mga kontra Duterte ug sa mga kontra sa war on drugs. Buot nilang ibasul sa pamunuan ang tanang hitabo sa kadalanan. Tingali para pagpahimong ngil-ad sa Pangulo, pagpaundang sa kampanya kontra druga ug pagpahumot sa ilang partido.
Technology. Tungod sa CCTV dali nang masakpan ang mga pulis lungkaban. Sunod angay na tingali pasul-ubon og body cam sama sa GoPro ang mga pulis para makita sa tanan ang ilang mga kalihukan.
Tungod ning maong mga hinungdan maingon ta nga nabutang ang spotlight karon sa police abuse. Ug maayo kini kay mapugos man ang kapulisan pagsumpo sa ilang mga kaugalingong dautang lihok.
Maong nalipay kita sa pagpanaktak, pag-ilis ug pag retrain sa tibuok police force sa dakbayan sa Caloocan. (Mao kini ang police force nga niadto lang miaging buwan gitagaag pasidungog isip pinakamaayo manirbisyo sa NCR.)
Ang maong pagpanaktak usa ka maayong lakang sa pagkuhag balik sa pagsalig sa katawhan sa pulis. Ug angay kitang magpasalamat kang National Capital Region Police Office (NCRPO) chief Director Oscar Albayalde ning iyang gihimo.
Dili susama ni Bato ug ni Aguirre nga dayon lang dupa sa mga sad-ang pulis. Ang NCRPO kamaong mopatid ug mopalagput ning mga way ayong sakop sa kapulisan.
Maayo na kini nga sinugdanan. Pero kinahanglan nga kasuhan ug silotan g’yud kadtong mga pulis nga nanglungkab ug kadtong mga mipatay sa mga batan-ong wala mosukol kanila.
Ang hipe ra ug ang iyang deputy maoy wala tanduga ni Albayalde. Tungod kay semana kapin pa lang sila na assign niining dakbayan sa Caloocan.