Gerard Pareja
Nyor Gamay (NG): Nyor, unsa man tong hitaboa sa Las Vegas nga kining 64 anyos nga retired accountant nga si Stephen Paddock namusil man sa usa ka open air country music concert gikan sa iyang giistarang lawak sa hotel nga nahimutang sa ika 32 nga andana nga maoy hinungdan sa pagkamatay sa 58 ka mga binuhat ug pagkaangol sa pipila ka gatos?
Nyor Daku (ND): Di tingali niya type ang country music. Gisabaan siyang naminaw sa mga kanta sa cowboys ug cowgirls maong gibuak niya ang bintana sa iyang lawak ug ni open fire siya.
NG: Dili na maoy hinungdan, Nyor kay matud pas iyang igsuon nga lalake nga fan kinig country music.
ND: Mao ba. Aw tuod no, diha may kanta si Kenny Rogers nga “The Gambler.” Unya dakong sugarol man kuno kini si Paddock. Basig daku nig pildi?
NG: Dili, Nyor, kay matud pa daghan kaayo kinig kwarta. Sigi man lang kuno kinig sakay og cruise ug dili kuno kini mopusta og ubos sa 100 dollars kada duwa sa baraha. Gani samtang nangandam siya ning maong pag pamusil, nagpada kinig 100,000 dollars sa iyang Pinay nga uyab nga si Marilou Danley nga mibisita ngari sa Pilipinas.
ND: Sa ato pa kwartahan diay kaayo kining si Stephen, diin man siya niani? Basig nay koniksyon siya sa mga terrorista.
NG: Wala, Nyor. Matud pas iyang igsuon, wala kini ideological o religious inclination. Sugal ug suroy ra g’yud ning iya. Nadatu ni siya kay pag-retire niya pagka accountant nag malampuson kini sa iyang mga investment sa real estate. Mamalit kuno kinig balay, iyang ipa ayo dayon ibaligya. Kon mahalinan kuno kini, Nyor, mopalit kinig laing balay, mamalit og high-powered firearms ug dayon moadtog casino o di ba mosakay og cruise. Sa kwenta sa mga pulis ug FBI dunay 47 ka armas si Paddock, 23 iyang gidala sa hotel ug 24 iyang gibilin sa ilaha.
ND: Murag nakasabot nako, Nyor.
NG: Unsa may nasabtan nimo, Nyor? Nganong namusil man siya?
ND: Nyor, unsa may buhaton mo kon duna kay camera?
NG: Aw, mamiktyur.
ND: Kon duna kay bola?
NG: Aw moduwa. Pero time sa, unsa mang bolaha? Unsa man say labot ani ni Paddock.
ND: Patiwasa sa ko. Unsa may buhaton nimo kon duna kay daghang pusil?
NG: Mamusil.
ND: Amen. Naniming lang si Dodong Stephen og higayon nga daghan siyang matarget.